ने. सं. ११४४ कौलाथ्व चौथी -

प्रहरीया आधारभूत तालिम क्वचाल

येँ – नेपाल प्रहरीइ प्रहरी अधिकृत (प्राविधिक) आधारभूत तालिमया दीक्षान्त समारोह क्वचाःगु दु । राष्ट्रिय प्रहरी प्रशिक्षण प्रतिष्ठान महाराजगंजया कार्यकारी निर्देशकनापं प्रहरी अतिरिक्त महानिरीक्षक पुष्कर कार्कीया प्रमुख आतिथ्यताय् आइतवाः तालिम समापन जूगु खः ।

उगु हे प्रतिष्ठानय् संचालन जूगु २८ क्वःगु समूहया प्रहरी अधिकृत (प्राविधिक) आधारभूत तालिमया दीक्षान्त समारोह नं क्वचाःगु दु ।
उत्कृष्ट प्रशिक्षार्थीतय्त सिरपाः व दसिपौ लःल्हानादिसें प्रहरी अतिरिक्त महानिरीक्षक कार्कीं नेपाल प्रहरीया प्रशिक्षण प्रणाली दुने संचालन जुइगु न्ह्यागुं दर्जाया आधारभूत तालिम नं महत्वपूर्ण व विशेष जुइ धयादिल ।

प्रतिष्ठानं संचालन याइगु थीथीकथंया आधारभूत तालिममध्ये व्यावसायिक प्राविधिक प्रहरी जनशक्ति उत्यादन यायेत प्राविधिक आधरभूत तालिम संचालन याना वयाच्वनागु वय्कःया धापू दु । वय्कलं तालिमय सयेकूगु खँयात थःगु व्यवहारय् नं हये फत धाःसा हे जक तालिमय् काःगु ज्ञान पूर्ण जुृइ धासें तालिमय् काःगु ज्ञान, सीप व दक्षताया प्रयोग यानाः कार्यक्षेत्रय् परिणाममुखी लिच्वः हयेत सकल प्रशिक्षार्थीतय्त निर्देशन बियादिल ।

प्रतिष्ठानया निर्देशक नापं प्रहरी नायब महानिरीक्षक दानसिंह बोहरां सुभाय् देछानादीगु ज्याझ्वलय् सह–निर्देशक नापं प्रहरी वरिष्ठ उपरीक्षक बसन्तबहादुर कुँवरं प्रशिक्षार्थीतय्त शब्दोचारणपाखें सपथ ग्रहण याकादीगु खः ।