लोक साहित्य भवनया निंतिं सत्यमोहनया छेँ

यल – लोक साहित्यया संरक्षण व संवद्र्धन यायेगु तातुनाः न्ह्याः वनाच्वंगु लोक साहित्य परिषद्या आः थःगु हे भवन निर्माण जुइगु जूगु दु । परिषद्या संस्थापकलिसें संरक्षक वाङ्मय शताब्दीपुरुष सत्यमोहन जोशीया थनया बखुंबहालय् च्वंगु पुख्र्यौली छेँ ‘लोक साहित्य भवन’य् रुपान्तरण जुइत्यंगु दु ।

उकिया निंतिं शताब्दीपुरुष जोशीं थःगु भागय् लाःगु २ आना २ पैसा २ दामया छेँ लोक साहित्य भवन निर्माणया निंतिं परिषद्यात दान बियादीगु खः । थौंकन्हय् वय्कः च्वनाच्वंगु छेँ थुनाः भवन निर्माणया निंतिं वंगु विहीवाः साइत पुजा यायेगु ज्या जूगु खःसा न्हूगु भवनया निर्माण प्रक्रिया नं याकनं न्ह्याकीगु जूगु दु ।

भवन निर्माणया निंतिं जूगु पुजाय् शताब्दीपुरुष जोशी थःहे सरिक जुयादीगु खःसा उगु इलय् परिषद्या पदाधिकारी लगायतया उपस्थिति दुगु खः । परिषद्या संस्थापकलिसें थौंकन्हय् संरक्षक जुयाच्वनादीम्ह वय्कलं थःगु भागय् लाःगु जग्गा लोक साहित्य परिषद्या भवन निर्माणया निंतिं दान बियादीगु खःसा भवन निर्माणया निंतिं सांसद कृष्णलाल महर्जनं सांसद कोषपाखें ५० गू लाख तका दां बियादीगु जूगु दु ।

प्यतँजाःया उगु भवनया क्वय्या तल्लाय् परिषद्या ज्याकू दइसा नितँजालय् वाङ्मय शताब्दीपुरुष जोशी च्वनादी । अथे हे जोशीया थीथी कृति संरक्षणया यायेगु ल्याखं स्वतँजालय् सफूधुकूकथं निर्माण याइगु जूगु दुसा प्यतँजालय् वय्कः थम्हं संकलन यानादीगु सफू, अभिलेख, दस्तावेजत आदि तयेगु योजना दयेकातःगु दु । वइगु असारतकया दुने भवनया नितँजाः तक निर्माण क्वचायेकेगुकथं न्ह्याः वनाच्वनागु परिषद्या नायः प्रा. प्रेमशान्ति तुलाधरं कनादिल ।

सम्बन्धित बुखँ

LEAVE YOUR COMMENTS