भुखाय् पीडितपाखें बैंकया ब्याज मपुलेगु निर्णय

येँ – भुखाय् पीडित जनतां यदि ब्याज दर क्वमकाल धाःसा थीथी बैंकं कयातःगु त्यासाया ब्याज मपुलेगु निर्णय याःगु दु । म्हिगः शनिवाः यलया अशोक हल पिने च्वंगु भुखाय् जनताया मुँज्यां थ्व निर्णय याःगु खः ।

भुखाय् पीडित जनतां २ प्रतिशत ब्याजदरं काःगु पुनर्कर्जा राष्ट्र बैंकं नवीकरण याना मबिउगुलिं १३ निसें १६ प्रतिशत तक ब्याज पुले मालाच्वन धासें नेपाल राष्ट्र बैंक व अर्थमन्त्री युवराज खतिवडायात तकं समस्या बारे जानकारी याकेधुंकाः नं भुखाय् पीडित जनताया बारे छुं हे निर्णय मयाःगुलिं आः थःपिंसं कयातयागु त्यासाया ब्याज मपुलेगु धकाः निर्णय याःगु खः ।

थुकिया बारे वइगु मंगलवाः राष्ट्र बैंकयात जानकारी याकेगु निर्णय नं भेलां याःगु दु । अथेहे भेलां थःपिनिगु समस्यायात कयाः थीथी निकाययात पत्राचार यायेगु निर्णय नं याःगु दु ।

तःभुखाय् ब्वयेधुंकाः सरकारं भुखाय् पीडित जनतायात २ प्रतिशत ब्याजदरं न्यादँनिसें झिदँ तक त्यासा बीगु घोषणा याःगु खःसा वयां लिपा राष्ट्र बैंकं थीथी बैंकयात सर्कुलर छ्वयाः २ प्रतिशत ब्याज दरया पुनर्कर्जा नवीकरण मयायेत निर्देशन छ्वःगु खः ।

भुखाय् पीडिततलिसे थीथी चरणय् जूगु खँल्हाबल्हा लिपा राष्ट्र बैंक थ्व सम्बन्धी ऐन बाफिया संशोधन यायेत सहमत जूगु खँ पिहां वःगु दु । तर संशोधन यायेगु धाःसां थुकिया छुं निर्णय धाःसा मयाःगुलिं पीडित तम्वःगु खः ।