दाहालया धापू ‘बेमौसमया बाजं’

येँ – सत्ता संचालन व पार्टीया नेतृत्वयात कयाः नेपाल कम्युनिष्ट पार्टीया अध्यक्ष पुष्पकमल दाहालं दबाब तच्वयेका हयेवं पार्टी दुनेया आन्तरिक विवाद बुलुहुँ तच्वया वःगु दु ।

अध्यक्ष दाहालं प्रधानमन्त्री व पार्टीया मेम्ह अध्यक्ष केपी शर्मा ओली भारत भ्रमण वनाच्वंगु इलय् पार्टीया एकीकरणया इलय् थःपिनि दथुइ पालंपाः सत्ता संचालन यायेगु कथं सहमति जूगु धकाः सार्वजनिक यायेवं पार्टी दुने विवाद तच्वया वःगु खः ।

दाहालया धापू लिपा पार्टी दुने निगू धार खने दयावःगु दु । छगू धार प्रधानमन्त्री व पार्टीया अध्यक्ष छम्ह हे जुइमाः धयागु दुसा मेगु धार प्रधानमन्त्री व पार्टीया अध्यक्ष बिस्कं बिस्कं जुइमाः धइगु दु । न्हापाया एमालेया नेतातय्सं दाहालं गुगु खँ न्ववात उकियात कयाः ‘बेमौसमया बाजा’ धकाः टिप्पणी यानाच्वंगु दु ।

दाहालया उगु धापुतिं राजनीतिक स्थायित्व मदयेकेगु कुतः जूगु धासें उमिसं कुँखिनेगु ज्या तच्वयेका हःगु दु । दाहालया उगु धापुतिं देशय् हाकनं राजनीतिक अस्थिरता हइगु द्वपं उमिसं बिया वयाच्वंगु दु । दाहालया धापु लिपा पार्टी दुने बिस्कं कथंया तरङ ब्वलंगु धासें छम्ह सांसदं ‘आः दुई तिहाइ दुगु सरकारं नं न्यादँ तक राजनीतिक स्थिरता हये मफत धाःसा नेपालय् न्ह्याबलें राजनीतिक अस्थिरता ब्वलनी’ धयादीगु दु ।

मेखे पूर्व माओवादीया छुं नेतातय्सं धाःसा पार्टी अध्यक्ष व प्रधानमन्त्री बिस्कं बिस्कं जुइमाः धकाः थीथी सञ्चार माध्यमय् धायेगु यानाहःगु दु । पूर्व माओवादी नेतात अग्नि सापकोटा, हरिबोल गजुरेलपिंसं थज्याःगु धापू व्यापक यायेगु ज्याय् लगे जुयाच्वंगु दु ।पार्टी एकीकरणया ज्या पूमवंनीवं वयाच्वंगु थज्याःगु विवादं यानाः एकीकरणयात तकं लिच्वः लाइगु आशंका जुयाच्वंगु दु ।