ख्वप जिल्लाव्यापी धिमे कासाय् न्हूजः धिमे खलः न्हाप

ख्वप – ख्वप नगरपालिकाया ग्वसालय् जूगु जिल्लाव्यापी धिमे बाजं धेँधेँबल्लाः कासाय् ख्वप नगरपालिका वडा नं. १०या नगांचाय् च्वंगु न्हूजः धिमे खलः न्हाप लाःगु दु ।ख्वपन्यंकंया ७७ गू धिमे पुचलं ब्वति काःगु कासाय् वडा नं. ९ दत्तात्रयया ख्वप धिमे खलः लिउ व चाँगुनारायण नगरपालिका छालिबया श्री गणेश दाफा भजन खलः लियांलिउ लाःगु दु। अथे हे नगांचा धिमे खलः व द राइजिंग कल्चर ग्रुपं हःपाः सिरपाः त्याकेत ताःलाःगु दु ।

कासाय् विजयी धिमे खलःयात ज्याझ्वःया मूपाहां नेपाल मजदुर किसान पार्टीया नायः नारायणमान बिजुक्छेँ रोहितं सिरपाः व दसिपौ लःल्हानादीगु खः । कासाय् न्हाप, लिउ, लियांलिउ व हःपाःयात छसिकथं स्वीद्वः, नीन्याद्वः, नीद्वः व झिद्वः-झिद्वः तका लिसें धिमे व छज्वः भुस्याः लःल्हाःगु खः ।

दत्तात्रय चोकय् निन्हुयंकं जूगु कासाया समापन ज्याझ्वलय् मूपाहां रोहित, बागमती प्रदेशया सांसद सुरेन्द्रराज गोसाई, ख्वप नपा उपप्रमुख रजनी जोशी, वडाअध्यक्षपिं उकेश कवां, राजकृष्ण गोरा, हरिप्रसाद बासुकला, व निर्णायकमण्डलपाखें शारदा डंगोलं नवानादीगु खः ।