चीनया भाइरसं येँय् माक्स न्यायेगु मंत

येँ- चीनया वुहानय् कोरोना भाइरसया संक्रमण जुइवं नेपालय् मास्कया अभाव शुरु जूगु दु । चीनय् कोरोना भाइरस न्यनेवं मास्कया माग अप्वयाः नेपालय् मास्कया अभाव शुरु जूगु खः । कोरोना भाइरसया कारणं चिनियाँ व्यापारीतय्सं नेपालय् दुगु मास्क न्यानाः चीनय् हे निर्यात यायेवं नेपालय् मास्कया अभाव शुरु जूगु खः । नेपालय् चीन व भारतं मास्क आपूर्ति जुया वयाच्वंगु खःसा चीनय् भाइरसया प्रकोप लिसें माक्सया माग अप्वयेवं मास्कया भाः थहां वंगु खः ।
थौंकन्हय् येँय् मास्कया अभाव जुयाच्वंगु दु ।

येँय् मास्कया अभाव जुइवं बजारय् माक्सया भाः नं थहां वंगु खँ व्यापारीतय्सं धाःगु दु । व्यापारीतय् कथं मास्कया भाः ८ निसें १० गुणा थहां वंगु दु । न्हापा नीतका तका वंगु मास्क आः बजारय् निसः तका थ्यंगु खँ व्यापारीतय्सं धाःगु दु । वासः व्यवसायीतय् कथं नेपालय् दयेकीगु साधारण कापःया मास्क निसें भ्वंया मास्क व विदेशं आयत याइगु प्रोटेक्टिभ लिसें मेडिकल मास्क तकं अभाव जुयाच्वंगु दु ।

न्हापा नेपालय् चीनं मास्क आयात जुयाच्वंगु खःसा आः वयाः चिनियाँ व्यापारीतय्सं हे नेपालय् दुगु मास्क न्यानाः चीनय् निर्यात यानाच्वंगु कारणं मास्कया अभाव जूगु खँ धाःगु दु ।