‘थेरवादी विहारया नं मौलिक स्वरुप दये माल’

येँ – पुलांगु वज्रयानी विहारत स्वयेसातकि म्हसीकेफु, महायानी गुम्बात नं स्वयेसातकि म्हसीकेफु तर थेरवादी विहारया धाःसा मौलिक स्वरुप मदु । फुक्क हे विहारया स्वरुप पाः । उकिं फुक्कं थेरवादी विहारया नं छगू हे कथंया मौलिक स्वरुप आवश्यक जूगु बिचाः न्ह्यःने वःगु दु ।

थनया भृकुटीमण्डपय् च्वंगु बुद्ध विहार पुननिर्माण ज्याया लागिं येँ महानगरपालिकापाखें १ करोड तकाया चेक लःल्हासें येँ मनपाया मेयर विद्यासुन्दर शाक्यं थ्व खँ न्ह्यथनादीगु खः । ज्याझ्वलय् न्ववासें मेयर शाक्यं स्वनिगःया फुक्कं थेरवादी विहारया नं छगू मौलिक स्वरुप दयेमा धकाः उकिया छगू नमूना कथं बुद्ध विहार निर्माण यायेत मनपां ग्वाहालि यानागु खँ कनादिल ।

वय्कलं सम्पदा निर्माणया देय्या स्वंगुलिं सरकारयाके माक्व बजेट दु धासें उकिया लागिं ज्या यानाच्वंपिंसं माग यायेत छुं हे कथं लिचिलेम्वाःगु खँ नं कनादिल ।छगू करोडया चेक लःल्हानादिसें विहारया प्रमुख लिसें अखिल नेपाल भिक्षु महासंघया महासचिव भिक्षु कोण्डन्यं स्वनिगःया थेरवादी विहारतय्त नं मौलिक स्वरुप बीगु लागिं थनया परम्परागत वास्तुशैलीयात नाला कयागु खँ कनाबिज्यात ।

ज्याझ्वलय् परम्परागत नेवाः शैलीं विहारया डिजाइन तयार यानादीम्ह ई. सजिव शाक्य, उगु क्षेत्रया संघीय सांसद भिमसेनदास प्रधान, प्रदेश सांसद जीवन डंगोल लिसें पुनर्निर्माण समितिया दुजः सुनिल महर्जनं नं न्ववानादीगु खः । तःभुखाचय् क्षति जूगु बुद्ध विहार प्यंगू करोड तका लागतय् पुनर्निर्माण जूगु खःसा उकियात द्रव्यमान सिं तुलाधर (भाइराजा साहु) पाखें छगू करोड लिसें मेमेपिंपाखें नं आर्थिक ग्वाहालि वःगु खः ।

सम्बन्धित बुखँ

LEAVE YOUR COMMENTS