ने. सं. ११४४ कौलाथ्व पारू - नःलास्वनेगु

नेवाः इंग्लिस स्कूलया झिंच्याक्वःगु अभिभावक दिवस

येँ (नेपालभाषा टाइम्स)( नेवाः वस्ती नेवाः स्कूल अभियान अन्तर्गत थेच्वय् संचालन जुयाच्वंगु नेवाः इंग्लिस स्कूलया झिंच्याक्वःगु अभिभावक दिवस व सांस्कृतिक ज्याझ्वः जुल ।

गोदावरी नगरपालिकाया मेयर गजेन्द्र महर्जन मूपाहाँ कथं झायादीगु ज्याझ्वलय् स्कूलया मस्तय्त सांस्कृतिक ज्याझ्वः न्ह्यब्वःगु खः । ज्याझ्वलय् न्ववानादिसें मेयर महर्जनं नेवाः इंग्लिस स्कूल गोदावरी नपा दुनेया हे छगू अब्बल स्कूल कथं पिहां वःगु खँ न्ह्यथँसें थौंकन्हय् थःत थुगु स्कूलय् थः मस्त भर्ना यायेमाःगुलिं सिरफार यानाबीमाल धकाः वइगु खँ कनादिल ।

वय्कलं धयादीगु दु, ‘गोदावरी नगरपालिका दुने सेन्ट जेभियर्स थेंज्याःगु स्कूल दु । उकुन्हु छम्हेसिनं जित थः मचा भर्ना यायेत धयाबीमाल धकाः इनाप यात । जिं ला सेन्ट जेभियर्स स्कूलय् भर्ना यायेमाल धाःगु जुइ धकाः च्वनां थन नेवाः इंग्लिस स्कूलय् भर्ना यायेत धकाः धाःगु जुयाच्वन ।’

विद्यालय व्यवस्थापन समितिया दकलय् थकालिम्ह दुजः नानीनन्द ग्वालाया सभापतित्वय् जूगु ज्याझ्वलय् स्कूलया संस्थापक प्रिन्सिपलं न्हू भर्ना जूवःपिं मस्तय्त खादा क्वखायेकाः लसकुस याःगु खः । अथेहे स्कूल पिने जूगु थीथी गतिविधिइ सिरपाः त्याकावःपिं स्कुलया १४ म्ह विद्यार्थीपिंत नगद सिरपाः नं लःल्हाःगु खः ।

ज्याझ्वलय् न्ववासें प्रिन्सिपल महर्जनं थःम्हं विद्यार्थीतय्त स्कूलय् जक सीमित मयासे थीथी क्रियाकलाप, अवलोकन भ्रमणय् संलग्न याना वयाच्वंगु खँ कनादिसें झिंच्यादँ न्ह्यः गुम्ह मस्तय्त ब्वंकाः सुरु यानागु स्कूलय् थौंकन्हय् न्यासःम्ह विद्यार्थीत दुगु खँ न्ह्यथनादिल । ज्याझ्वलय् गोदावरी नपाया उपप्रमुख मुना अधिकारी, नेवाः बस्ती नेवाः स्कूल अभियानया कजि दिपक तुलाधर, गोदावरी नपा दुनेया सामुदायिक व निजी स्कूलया प्रधानाध्यापकपिं पाहाँ कथं झाःगु खः ।