मरुसतःया अप्पा थ्यंके हल, आकिवं असार तक छतँ दयेके सिधयेकेगु लक्ष्य

येँ – तःभुखाचं ध्वस्त जूगु मरुसतः पुनर्निर्माणया लागिं दयेके बिउगु विशेष कथंया अप्पा निर्माणस्थलय् थ्यंके हःगु दु । म्हिगः व म्हीग यानाः निगू टिप अप्पा निर्माणस्थल थ्यंके हःगु खँ काष्ठमण्डप पुनर्निर्माण समितिया नायः लिसें सांसद राजेश शाक्यं ‘नेपालभाषा टाइम्स’ यात कनादिल ।

मरुसतः दयेकेगु लागिं समितिं अन न्हापा गज्याःगु अप्पा प्रयोग याना तःगु खः पाय्छि अज्याःगु हे अप्पा दयेके बिउगु खः । थ्व अप्पा तीनथानास्थित दक्षिण बाराही अप्पा उद्योगं तयार याना बिउगु खः । नायः शाक्यं कनादी कथं थ्व अप्पाया आकार जक मखु उकिया शक्ति समेत न्हापा गथे खः अथे हे यायेगु कुतः जूगु दु ।

थ्व अप्पाया साइज २४.५ सेमि हाकः, १६.५ सेमि ब्या व ५ सेमि फि (उचाई) दु ।

थुकिया शक्ति नं न्हापा छ्यलातःगु अप्पा ति हे बल्लाइगु खँ नं धाःगु दु । परीक्षण याना स्वःबलय् थुकिया शक्ति ७.६ स्टेन टेस्ट दु । उद्योगं छुं ई न्ह्यः बी हःगु नमूना अप्पाया शक्ति थुलि दुगु खःसां आः छ्यलेगु लागिं बी हःगु अप्पा नं थुलि हे शक्तिशाली खः लाकि मखु धकाः क्रसचेक नं जुइ तिनिगु खँ नं नायः शाक्यं कनादिल । थ्व सम्बन्धी विज्ञतय्सं थुकिया परीक्षण याइ ।

मरुसतःया लागिं हे जक धकाः विशेष रुपं दयेके बिउगु थ्व अप्पा छपाया मू ४० तका तू । थुकी ज्याला, ढुवानी, चाङ लगे यायेगु आदि नं दुथ्याः । तर मरुसतःया लागिं धकाः उद्योगपाखें खुतका पाः यानाः छपाया ३४ तका जक काःगु खँ नं वय्कलं कनादिल ।

थ्व अप्पा हयेधुंकाः आः मेगु महिनाय् सिँ हयेगु तयारी जुयाच्वंगु दु । अथे खःसां अप्पा हयेधुंकूगु जूगुलिं आः मरुसतः पुनर्निर्माणया ज्या सुरु जुइगु खँ नं वय्कलं कनादिल । मरुसतः दयेकेगु लागिं समितिं आवश्यक नक्सा नं तयार यायेधुंकूगु दु । समितिया पूर्ण बैठकं उकियात अनुमोदन यायेधुंकूगु दुसा आः पास यायेगु लागिं पुरातत्व विभागय् छ्वःगु दु । विभागं नक्सा पास यानाः वहे कथं दयेकूसां जिल धकाः स्वीकृत बीवं ज्या सुरु जुइ । आकिवं असार मसान्त तकया दुने मरुसतःया छतँ दने सिधयेकेगु ग्वसाः दु ।

सम्बन्धित बुखँ

LEAVE YOUR COMMENTS