बलात्कार घटना सुचुकूम्ह प्रहरी निलम्बन

येँ – वंगु बिहिवाः दरवारमार्गय् च्वंगु ल्यान्डमार्क होटलय् छम्ह मिसायात सामूहिक बलात्कार याःगु घटनायात सुचुकूगु द्वपनय् स्वम्ह प्रहरीयात कारवाही याःगु दु । महानगर प्रहरी परिसरं याःगु अनुसन्धान लिपा दरवारमार्ग वृत्तया सहायक निरीक्षक चन्द भण्डारीयात निलम्बन याःगु दुसा प्रहरी निरीक्षक लक्ष्मणसिंह थकुरीयात प्रहरी प्रधान कार्यालय नं. १ गणय् कुनेयंकूगु दु ।

अथेहे वृत्त प्रमुख डिएसपी तिलक भारतीयात यात प्रहरी परिसरय् सालाः अनुसन्धान न्ह्याकूगु दु । थ्व घटनाय् संलग्नपिं मिजंतय्पाखें ध्यबा कयाः घटना सुचुकेगु निंतिं सहायक निरीक्षक भण्डारीं मू भूमिका म्हितूगु धासें वयात निलम्बन याःगु खः ।

थ्व घटनायात कयाः कान्तिपुर पत्रिकाय् समाचार पिहां वयेवं महानगरीय प्रहरी परिसरया एसपी रामदत्त जोशीया नेतृत्वय् छानविन समिति गठन याःगु खः । समितिया प्रतिवेदन कथं थ्व कारवाही जूगु खँ परिसरया प्रमुख एसएसपी रविन्द्र धानुकं धयादीगु दु ।

प्रहरीं बलात्कारया द्वपं लानाच्वंपिं मिजंत लिसे हे मिले जुयाः घटनायात सुचुकेगु कुतः यायेवं उम्ह मिसा कान्तिपुर पत्रिकाय् वंगु खः । एसएसपी धानुकं गम्भीर प्रकृतिया घटना च्वय्या निकाययात रिर्पोटिङ मयासे सुचुकेगु धयाःगु तःधंगु गल्ती खः धासें थप अनुसन्धान न्ह्यानाच्वंगु खँ धयादीगु दु ।