आइसीसीं क्रिकेटरतय् तलब छ्वयाहल

येँ – अन्तर्राष्ट्रिय क्रिकेट परिषदं (आइसीसी) नेपाल क्रिकेट संघ (क्यान)यात निलम्बन यानातःगुलिं तलब काये मखनाच्वंपिं राष्ट्रिय कासामितय्सं निदँया तलब कायेखनीगु जूगु दु । आइसीसीं मबिसे तयातःगु निदँया तलब शुक्रवाः छ्वयाहःगु दु । आइसीसीं नीछम्ह कासामितय् निंतिं निदँया तलब कथं एकमुष्ठ छगू करोड २७ लाख ८७ ७८२ तका छ्वयाहःगु खः राष्ट्रिय खेलकूद परिषदं धाःगु दु ।

राखेपया हे पहलय् आइसीसीं थ्व ध्यबा छ्वयाहःगु खः । आइसीसी पाखें न्हापा निसें तलब कयाच्वंपिं नीछम्ह कासामित लिसे राखेपं सम्झौता यानाः छ्वया बीधुंकाः आइसीसीं तलब छ्वयाहःगु खः । आइसीसीं कासामित लिसें राष्ट्रिय प्रशिक्षक जगत टमाटा व व्यवस्थापक रमण शिवाकोटीया निंतिं नं निदँया हे तलब छ्वयाहःगु दु ।

आइसीसीं सन् २०१७ व १८ य् नेपाली क्रिकेटरतय्त स्वंगू ब्वय् ब्वथलाः तलब बीगु क्वःछिनातःगु खः । उबलय् आइसीसीं क श्रेणीया कासामितय्त लय् ३५ हजार, ख श्रेणीया कासामिपिंत लय् नीन्याद्वः व सी श्रेणीया कासामिपिंत लय् १५हजार बीगु क्वःछिनातःगु खः । न्हापाया थ्व हे निर्णय कथं आः तलब छ्वयाहःगु खः ।

आइसीसीं ब्वथलातःगु कासामि धलखय् कप्तान पारस खड्का, उपकप्तान ज्ञानेन्द्र मल्ल, शरद भेषावकर, वसन्त रेग्मी, सोमपाल कामी, दीपेन्द्र सिंह ऐरी व सन्दीप लामिछाने क श्रेणीइ, आरिफ शेख, करण केसी, ललित भण्डारी, अनिलकुमार साह, रोहित पौडेल, ललित राजवंशी व शक्ति गौचन ख श्रेणी व सुवा खकुरेल, सागर पुन, दिलिप नाथ, सुनिल धमला, सुसन भारी, प्रदीप ऐरी व विनोद भण्डारी ग श्रेणीइ लाः ।

क श्रेणीइ लाःपिंसं निदँया तलब कथं छक्वलं च्यागू लाख ४० हजार, ख श्रेणीयापिंस. खुगू लाख व ग श्रेणीयापिं स्वंगू लाख तलब कायेखनीगु जूगु दु ।

सम्बन्धित बुखँ

LEAVE YOUR COMMENTS