आसामय् नेवाःतय्त नं कोटा बीगु

थःगु पहिचान मालेत येँय् थ्यंकः वल आसामया नेवाःत

येँ – भारत सरकारपाखें आसामया नेवाःतय्त नं सेडुल ट्राइब वा सेडुल कास्ट धलखय् दुथ्याकाः आरक्षण बीगु लागिं प्रक्रिया शुरु याःगु दु । छुं ई न्ह्यः तिनि अन नेवाःतय् भाषा, संस्कृति, कला, नसात्वँसा, भेषभूषा आदि प्रदर्शन यानाः थःपिनि बिस्कं पहिचान दु धकाः प्रमाणित यायेगु ज्या जूगुलिं आसाम राज्य सरकारं नेवाःतय्त नं आरक्षणया कोटाय् लाकेगु प्रक्रिया न्ह्याकूगु खः ।

राज्य सरकारं थ्व प्रक्रिया न्ह्याकाच्वंगु हे इलय् नेवाःतय् आदिभूमिया अवलोकन यायेत येँय् थ्यंकः वःपिं आसामी नेवाःतय् प्रतिनिधिपिंसं थ्व खँ कनादीगु खः । आसामय् नं नेवाःतय् भाषा, कला, संस्कृतिया पुनरुत्थान यायेगु ताः तयाः अखिल भारतीय नेवार संगठन आसाम राज्य समितिया पदाधिकारीपिं दिपक नेवार, शेरबहादुर प्रधान, पशुपति नेवार लगायतपिं येँय् चाःहिउ वःगु खः ।

येँय् संस्कृतिविद् गणेशराम लाछिलिसे चाःहिलाः वय्कःपिंसं नेवाःतय् जात्रापर्व, खलः पुचः आदिया पदाधिकारीपिं नापलानाः खँल्हाबल्हा यानादीगु खः । आसामय् गणेशराम लाछिया हे पहलय् नेवाःतय् कला, संस्कृति, बाजं, नसात्वँसा आदिया प्रदर्शन यायेगु ज्या जूगु खः । उगु प्रदर्शनया निरीक्षण यायेत अबले आसाम सरकारया ट्राइबल रिसोर्स इन्ष्टिच्युसन अफ आसाम फर एसटी एण्ड एससीया प्रमुख असिम बोरा वःगु खः ।

वय्कलं आः केन्द्र सरकारयात छगू प्रतिवेदन दयेकाः छ्वया बीगु व उगु प्रतिवेदन प्रति केन्द्र सन्तुष्ट जुल धाःसा अनं हे नेवाःतय्त नं आरक्षणया व्यवस्था जुइगु खँ धाःगु दु । थ्व आरक्षण प्राप्त जुल धाःसा आसामया सरकारी शिक्षा, रोजगारीइ नेवाःतय्त नं सुविधा उपलब्ध जुइ ।भारतया पूर्वोत्तर राज्य आसाम मूलतः स्थानीय आसामी जातितय्गु भूभाग खः । अन थौंकन्हय् ४३ हजार नेवाःत दुगु खँ आसामी नेवाःतय् प्रतिनिधितय्सं कनादिल ।

आसामय् आसामी व बोडो जाति बाहेक मेगु चिचीधंगु जातियात गोर्खाली जाति धकाः म्हसीका तःगु दु । अज्याःगु गोर्खाली जाति अन १३ गू दु । वहे १३ गू गोर्खाली जाति अन्तर्गत नेवाः नं छगू जुयाच्वंगु दु । आसामन्यंकं गोर्खाली जातिया ल्याः धाःसा करिब १३ लाख ति दु ।

भारतया सिक्किमय् अनया राज्य सरकारं नेवाः लगायत मेमेगु अल्पसंख्यक जातियात सेडुल कास्ट धलखय् दुथ्याकाः शिक्षा, रोजगारीया ख्यलय् कोटाया व्यवस्था यायेवं आः आसामया नेवाःतय्सं नं अज्याःगु हे कोटाया माग याना हःगु खः । तर आसामया नेवाःतय्त अज्याःगु सुविधा प्राप्त याये सिक्किमय् थें अःपु मजूगु खँ वय्कःपिंसं कनादी । छाय्धाःसां सिक्किमय् गोर्खा जातियापिं हे मुख्यमन्त्री जुयाच्वंगु दु ।

उकिं अन गोर्खा जातिइ दुथ्याःपिंत सुविधा बीगु खँय् राज्य उदार दु । उकिसनं सिक्किमय् नेवाःत नं मेपिं स्वयां शक्तिशाली खनेदु । सिक्किम सरकारय् मन्त्री व सदनय् सांसद जुयाच्वंपिं नेवाःत यक्वं दुसा प्रशासनय् नं च्वय् च्वंगु पदय् तकं नेवाःत थ्यनाच्वंगु दु ।तर आसामय् नेवाःतय्गु अवस्था मेपिनि तुलनाय् लिउने हे लानाच्वंगु दु । अन आसामी जातिया दबदबा दु । थौंकन्हय् भारतीय जनता पार्टीया सरकार दु ।

आसामी धुंकाः मेगु शक्तिशाली जाति बोडोतय्सं अन अलग्ग हे स्वायत्त प्रदेश बोडोल्याण्ड टेरिटोरियल अटोनोमस डिस्ट्रिक्ट प्राप्त यायेधुंकूगु दुसा उगु निकायय् थौंकन्हय् बोडोल्याण्ड पिपुल्स फोरमं शासन यानाच्वंगु दु । वहे फोरम दुने छुं छुं नेवाःत नं दुथ्यानाच्वंगु दु । नेपालं लिहां वनेवं आसामय् नेवाः भाषा व संस्कृतियात च्वन्ह्याकेगु ज्याय् पहल यायेगु खँ नं वय्कःपिंसं कनादिल ।