ने. सं. ११४६ अनलाथ्व पुन्हि -

नागरिकता कायेत तकं विचौलिया

येँ – स्वनिगःया जनता नागरिकता व राहदानी कायेगु झ्वलय् तकं विचौलियापाखें ठगे जुइगु जुयाच्वंगुलिं सचेत जुइत येँया प्रमुख जिल्ला अधिकारी जनकराज दाहालं इनाप यानादीगु दु । उकथं हे वाणिज्य तथा उपभोक्ता हित संरक्षण विभागया महानिर्देशक नेत्रप्रसाद सुवेदीं नं उपभोक्ताया हितया निंतिं विभाग सक्रिय जुइगु खँ धयादीगु दु ।

म्हिगः येँया प्रमुख जिल्ला अधिकारीया नेतृत्वय् च्वंगु बैठकय् उपभोक्ता हितया निंतिं थीथी ज्याझ्वः हःगु खः । लिसें आः येँ जिल्लाय् अनुगमनय् वनीपिनिगु निंतिं नं बिस्कं आचारसंहिता जारी याःगु दु । आचार संहिता पालना जू मजू धकाः मेगु अनुगमन यायेगु नं सहमति जूगु खँ धाःगु दु ।