
थिमि(नेपलभाषा टाइम्स)- मध्यपुर थिमि बचत तथा ऋण सहकारी संस्थाया ग्वसालय् थनया निगू पुखुलिइ खुल्ला हिदान व वाया शिविर जुल । नेपाल रेडक्रस सोसाइटी मध्यपुर थिमि उपशाखा व डेन्टल आर्ट मल्टिस्पेसियालिटी क्लिनिकया मंकाः समन्वयय् उगु शिविर जूगु खः ।
शिविरय् मुक्कं ११३ म्ह स्थानीयतय् वाया परीक्षण याःगु खः । शिविर लिपा जूगु सहलहय् संयोजक डा. उज्ज्वल जोशीं शिविरय् वाया परीक्षण, एक्सट्रयाकसन व फ्लोराइडिङ लगायाया विशेषज्ञ सेवा बियागु जानकारी बियादिल ।
संस्थाया अध्यक्ष कृष्णकाजी मानन्धरं लिपांगु इलय् वित्तीय संस्थाप्रति ब्वलनाच्वंगु भ्रम चिइका छ्वयेमाःगु खँय् बः बियादिसें दक्वं वित्तीय संस्थायात छगः हे थलय् तयाः स्वयेगु व मूल्यांकन यायेगु ज्या मयायेत इनाप यानादिल ।
अप्वःथें वित्तीय संस्थां यक्व ब्याजया लोभ क्यनाः ध्यबा जक दुकायेत स्वःगुलिं सहकारी संस्थात समस्याय् लाःगु धासें सहकारीया छवि, संचालक व व्यवस्थापकया कार्यशैलीया मूल्यांकन यानाः सहकारीयात स्वयेगु दृष्टिकोणय् हिउपाः हयेमाःगु वय्कलं धयादीगु दु ।
उपशाखाया सभापति बाबुकाजी श्रेष्ठं हिया अभाव पूवंकेत हिदान ज्याझ्वः यानागु व लिपांगु इलय् हिया माग अत्याधिक मात्राय् जुयाच्वंगु जानकारी बियादिल ।
LEAVE YOUR COMMENTS