बालाजुया अनसन निरन्तर न्ह्याइगु

येँ (नेपालभाषा टाइम्स) – बालाजुया सतक विस्तार पीडित जूपिंसं म्हिगः निसें न्ह्याकूगु रिले अनसनयात निरन्तरता बीगु जूगु दु । सतक विस्तार पीडित संघर्ष समितिया नायः सुमन साय्मिं कनादी कथं आः निरन्तर रुपं रिले अनसनया लिसें याकनं हे मेगु आन्दोलनया घोषणा जुइफुगु खँ धाःगु दु ।

म्हिगः च्याघौया निंतिं जक अनसन च्वंगु खःसा थनिनिसें नीप्यघौ अनुसन च्वनेगु तयारी जुयाच्वंगु दु । वय्कलं बियादीगु जानकारी कथं थ्वहे झ्वलय् आः याकनं हे नागरिक बहस ज्याझ्वः यायेगु तयारी नं जुयाच्वंगु दु । सम्बन्धित पीडित जनताया थासय् हे येँ महानगरपालिकाया मेयर, उपमेयर, सहरी विकास मन्त्रालयया मन्त्री, सतक विभागया प्रमुख व उपत्यका विकास प्राधिकरणया प्रमुख भाइकाजी तिवारीपिंत दुथ्याकाः थज्याःगु बहस न्ह्याकेत्यनागु खँ नं अध्यक्ष साय्मि जानकारी बियादीगु दु । वय्कःया कथं थज्याःगु बहस उपत्यका विकास प्राधिकरणं अतिक्रमण याःगु थासय् स्थानीय जनताया उपस्थितिइ न्ह्याकेगु तयारी जुयाच्वंगु खः ।

मेखे थबहीली च्वंगु पलेस्वां पुखू अतिक्रमण यानाः छायादेवी कम्प्लेक्स दयेकूगु विरुद्ध म्हिगः माइतीघर मण्डलाय् स्थानीय जनतां धर्ना बिउगु दु ।

सम्बन्धित बुखँ

LEAVE YOUR COMMENTS