मनाङया तापक्रम माइनस १६ डिग्री

मनाङ (रासस)- चिकुगु अप्वया वयेवं हिमाली जिल्ला मनाङया तापक्रम न्हियान्हिथं कुहां वयेगु सुरु जूगु दु । थ्व झ्वलय् मंसिरया लिपांगु वाःतक थ्यंबलय् तापक्रम कुहां वयाः १६ डिग्री सेल्सियस थ्यंगु दु । सुथय्पाखेया तापक्रम माइनस ८ निसें १० तक थ्यंसां चान्हय् थ्यंमथ्यं मानइस १६ निसें १८ तक थ्यनाच्वंगु दु ।

मनाङया सिडिओ सुवासकुमार लामिछानेया कथं सदरमुकाम चामे जःखःया क्षेत्रय् माइनस १६ निसें माइनस १८ तक थ्यनगु जुयाच्वंगु दु । तसकं चिकुया वःगुलिं थनया जनजीवन नं थाकुयावःगु खँ वय्कलं धयादीगु दु ।

‘ख्वाउँया हितिया लः च्वापु जूगु दु । खुसिइ नं लः जमे जुयावःगु दु । लँय् च्वापुया च्वापु जुइधुंकूगुलिं लँ सुनसान जुइधुंकूगु दु । सवारी साधन वयेवने तसकं म्हो जुइधुंकल । लः कायेत हे थाकुया वयेधुंकल’ प्रजिअ लामिछानें धाःगु दु ।

चामे गाउँपालिकां सुचं हे पितबियाः विकास निर्माणया ज्या यायेबलय् सिमेन्ट छ्यलाः याइगु ज्या मयायेत इनाप याःगु दु । निमित्त प्रमुख प्रशासकीय अधिकृत नमनारायण मल्लं ख्वाउँगु कारणं सिमेन्ट छ्यलाः यायेमाःगु ज्याय् समस्या खनेदइगुलिं ज्या दिकेत निर्देशन बियागु खँ धाःगु दु ।

न्हापांखुसी च्वापु वा गायेवं थनया शैक्षिक संस्था बन्द जूगु खः । शैक्षिक संस्था बन्द जुइवं थनया अप्वः थें स्थानीयत ख्वाउँ छले यायेत जिल्लां पिहां वनेधुंकूगु दु । ख्वाउँगु अप्वया वयेवं थनया मनूत लमजुङ, येँ व पोखरापाखे वनेगु याइ ।

ख्वाउँ अप्वःसां पर्यटकत धाःसा मनाङ थ्यनाच्वंगु दु । अन्नपूर्ण संरक्षण क्षेत्र आयोजना (एक्याप) इकाइ कार्यलय मनाङया प्रमुख ढकबहादुर भुजेलं ख्वाउँगु अप्वःसां पर्यटकत धाःसा वयाच्वंगु खँ कनादिल । ‘सिजनबलय् स्वयां म्हो जूसां पर्यटतक धाःसा आः वनं वयाच्वंगु दु’ वय्कलं धयादिल ।

वय्कःया कथं थौंकन्हय् नं न्हिं झिन्याम्ह नीम्ह पर्यटक वयाच्वंगु दु । लँय् च्वापुलिसे म्हितु म्हितुं पर्यटकत थोराङला भञ्ज्याङ, तिलिचोपाखे वनेगु जुयाच्वंगु दु । च्वय्या क्षेत्रया होटल पूवंक बन्द मजूनिगु खँ भुजेलं कनादीगु दु । पर्यटकतय्त मौसमसम्बन्धी जानकारी बियाः लँय् जुइफुगु जोखिमयात ध्यानय् तयाः यात्रा यायेत सुझाव बिया वयाच्वनागु वय्कलं धयादिल ।

मनाङ डिस्याङ गाउँपालिका ५ भ्राकाया किसान सोनाम लामां अप्वः थें गामय् च्वंपिं कुहां वनेधुंकूगु जूसां थःपिं छँे स्वयेत व याकचौरी स्वयेत छेँय् हे च्वंच्वनागु खँ कनादिल । वय्कलं धयादिल, ‘चिकुबलय् माउ चौरी व ल्याय्म्हपिं याकतय्त नकेत व बचे यायेत अःपुइ, तर थ्व इलय् मस्तय्त धाःसा बचे यायेत तसकं थाकु । तःधिकःपिं पशुतय्सं थःपिंसं हे घाँय्, लः मालेफइ । ’

वय्कःया कथं तःन्हु तक च्वापुवा गायाच्वन धाःसा भचा भचा मुंकातयागु घाँय् नं मदया वनी, अले नयेमखनाः गंसि जुयाः सिनावनी । चिकुलाया इलय् मस्तय्त गोठ दयेकाः तयेमाःसा च्वापु यक्व दःसां तःधीपिं याक चौरीतय्त च्वापुइ हे त्वःतातइ । चिकुलाय् घाँय् म्हो जुइगुलिं दुरु नं म्हो जक बी । थ्व दुरु उमि हे मस्तय्त जक गाइ । उकिं थ्व इलय् दुरु नं न्ह्याइमखुगु खँ सोनाम लामां कनादिल ।

वय्कःया कथं चिकुगु अप्वया वनकि याकचौरीतय्त लेकया खर्कपाखें गामय् पाखे हे हइ । थ्व इलय् नावरत नं क्वय्पाखे कुहां वइ । गुकिं यानाः हिउँ चितुवा नं शिकारया निंतिं कुहां वइ । चितुवापाखें पशुतय्त बचे यायेग निंतिं थःपिं छेँय् हे च्वनेमाःगु वय्कलं धयादिल ।

मनाङय् फागुन निसें बुँज्या यायेगु ई सुरु जुइ । थ्व इलय् बेंसीइ क्वत हयातःपिं पशुतय्त नं लेकया खर्कपाखे यंकी । थौंकन्हय् मनाङय् ४,३९७ म्ह याकचौरी दुगु भेटेरिनरी अस्पताल तथा विज्ञ केन्द्रया प्रमुख नरेन्द्रं राईं कनादिल ।