ने. सं. ११४६ चाैलागा चर्हे - मातातीर्थ चःह्रे

इराकं विदेशीत लिहां वनेगु शुरु

नेपाःमित धाःसा खतरा दुसां अन हे

येँ – इरानं इराकय् च्वंगु अमेरिकी सैनिक अखडाय् आक्रमण शुरु यायेवं इराकय् च्वनाच्वंपिं थीथी देशया नागरिकत लिहां वनेगु शुरु याःसां अन च्वंपिं नेपाली नागरिकत धाःसा आः तक सुं नं लिहां वयेगु तयारीपाखे मदुगु खँ सीदुगु दु । इराक समेत स्वइगु कुवेतया नेपाली राजदूतावासं इराकय् च्वंपिं सुं नेपाःमियात समस्या दुसा स्वापू तः वा धकाः आह्वान याःसां नं आः तक सुं नं नेपाःमिं स्वापू तः मवःनिगु खँ धाःगु दु ।

नेपालं इराकय् ज्या याः वनेगु अनुमति नेपाली श्रमिकतय्त बियातःगु मदु। अथे खःसां थौंकन्हय् इराक दुने करिब १५ हजारम्ह नेपाःमि ज्या यानाच्वंगु दु। उपिं फुक्क नेपालं तप्यंक उखे वंपिं मखुसें खाडीया थीथी देशं अन अवैध रुपं वनाः ज्या यानाच्वंपिं खः। इराक संसारया हे दकलय् असुरक्षित देय् जूगु कारणं नेपालं अन रोजगारीया अनुमति मबिउगु खः ।

राजधानी बगदादय् नेपाःया छुं नखःचखःया लसताय् कार्यक्रम यायेगु धाल कि नेपाःमित छक्वलं हे हुल मुं वइगु खँ अन ज्या याइपिं नेपाःमितय्सं धाःगु दु ।

इरानपाखें आक्रमण शुरु यायेवं खास यानाः अन च्वंपिं भारतीय व पाकिस्तानी ज्यामित लिहां वनेगु तरखरयानाच्वंगु दु। यक्व मनूत लिहां वनेधुंकूगु व मेपिं विदेशीत नं वयेगु बन्द जूगुलिं इराकया आपालं होटल, रेष्टुरेन्टट नं बन्द याये मालीगु अवस्था वयाच्वंगु खँ धाःगु दु। अज्याःगु यक्व धइथें होटल रेष्टुरेन्टय् नेपाःमित ज्या यानाच्वंगु दु। यदि थ्व होटलत बन्द जुल धाःसा अन ज्या यानाच्वंपिं नेपाःमि ज्यामितय्गु नं विचल्ली जुइ फइगु खँ धाःगु दु। इरानी आक्रमण लिपा आः इराकया स्थिति अझ हे भयावह जुइ फइगु अनुमान अधिकांश नेपाःतय्सं यानाच्वंसां उमिसं लिहां वनेगु बारे धाःसा आः तक छुं बिचाः मयाःनिगु खँ धाःगु दु ।

नेपाःमि सैनिकयात खतरा मदु

इराकय् शान्ति सेनाया रुपय् ज्या यानाच्वंपिं नेपाली सेनायात सतर्क जुइगु लागिं नेपाली सेनां निर्देशन बियाछ्वःसां अन च्वंपिं नेपाःमि शान्ति सैनिकतय्त छुं कथंया खतरा धाःसा मदुगु खँ धाःगु दु। इराकय् थौंकन्हय् राष्ट्र संघीय शान्ति सेनाया रुपय् ७७ म्ह सैनिकत खटे जुयाच्वंगु दु। अन खटे जुयाच्वंपिं शान्ति सैनिकत अमेरिकी अखडाय् च्वंगु मखुसें अलग्ग हे अखडा दयेकाः च्वनाच्वंगु कारणं उमित इरानी आक्रमणया छुं खतरा मदुगु खँ धाःगु दु। अन अमेरिकी सैनिक अखडा व राष्ट्र संघीय सैनिक अखडा अलग अलग थासय् लानाच्वंगु जुयाः नेपाःमि सैनिकयात छुं खतरा मदुगु दावी उमिसं याःगु दु। इरानं अन विशेष यानाः अमेरिकी सैनिक अखडाय् जक आक्रमण यानाच्वंगु दु। म्हीग अन १ घन्टा आक्रमण याःगु खःसा आः हानं मेगु आक्रमणया नं सम्भावना दुगु खँ धाःगु दु ।