भारतीय सेनां गोर्खा जवानया सीम्ह बिया महः

येँ – भारतीय सेनाय् ‘गोर्खा सैनिक’या रुपय् भर्ती जुयाच्वंपिं नेपाली सैनिकत सीबलय् उमिगु अन्त्येष्टि यायेगु सवालय् उमि छेँजःपिंत तसकं दुःख जुइगु खँ सार्वजनिक जूगु दु ।

गनं भिडन्त जुयाः वा छुं कारणं भारतीय सेनाय् दुपिं गोर्खा सैनिकया मृत्यु जुल धाःसा वयागु सीम्ह अन्त्येष्टिया लागिं नेपाः छ्वया हये मछिं धकाः छ्वया महइगु कारणं वया परिवारयात थप पीडा जुइगु खँ धाःगु दु । भारतीय सेनाया छुं गोर्खा सैनिक सित धाःसा वयागु सीम्हय् भारतया हे ध्वाँय् फायेकेगु चलन दु। लिसें सीम्हेसित भारतीय सेनां हे सलामी बीमाःगु नं चलन दु। नेपाःया भूमिइ वयाः अज्याःगु ज्या यायेबलय् नेपाः दुने विरोध जुइ फइगु खँयात ध्यानय् तयाः भारतं शव नेपाः छ्वया महइगु खँ धाःगु दु ।

छुं न्हि न्ह्यः तिनि काश्मिरया भिडन्तय् सीम्ह गोर्खा सैनिक जवान अर्जुन थापामगरया सीम्ह नेपाः हयेगवु लागिं माग जूबलय् नं थ्वहे समस्या पिहां वःगुलिं भूपू गोर्खा सैनिकतय्सं सीम्ह सैनिकया शव नेपाः छ्वया हयेमाः धकाः हानं माग याःगु खः । गोर्खा सैनिकतय्सं वंगु ताः ई न्ह्यवंनिसें थ्व माग याना वयाच्वंगु खः ।

भारतं शव बीगु मयाःसां छुं सैनिक जवानतय्गु शव धाःसा नेपाः हःगु खँ धाःगु दु। थौंकन्हय् भारतय् सुं गोर्खा सैनिक मंत धाःसा अनया हे गंगा खुसि सिथय् सैनिक सम्मानसाथ अन्त्येष्टि याइगु चलन दु। उगु इलय् वया छेँजःपिंत भारतय् हे सःतेगु याइ । थुकिं यानाः परिवारयात दुःख जुइगुया नापं उमि थःगु संस्कार कथं अन्त्येष्टि याये
मखनाच्वंगु खँ धाःगु दु ।

थौंकन्हय् भारतीय सेनाय् गोर्खा सैनिकया रुपय् ५० हजार नेपाली सैनिकतय्सं ज्या यानाच्वंगु दु। उकी मध्ये ६० प्रतिशत सैनिकत नेपाःया नागरिक खःसा ४० प्रतिशत भारतीय नागरिकता कायेधुंकूपिं खः । अन सीपिं नेपाली मूलया सैनिकतय्गु शव नेपाः हयेगु लागिं भूपू गोर्खा सैनिक संगठनतय्सं भारतीय सरकारया गृहमन्त्री अमित शाहयात समेत नकतिनि नाप लानाः ज्ञापनपौ बिउगु दु। थुकी गृहमन्त्री शाह सकारात्मक जूगु खँ नं धाःगु दु ।