‘तिंख्यःया निर्माण सामग्री चीकेत्यंगु दु’

येँ – येँ महानगरपालिकाया मेयर विद्यासुन्दर शाक्यं तिंख्यः नापसं च्वंगु वीर अस्पताल व दरवार स्कूल निगुलिं निर्माण सिधःगुलिं आः तिंख्यलय् दुने तयातःगु निर्माण सामग्री स्वतः हे चीकेगु ज्या न्ह्याइगु खँ कनादीगु दु । आः लत्याया दुने निर्माण क्वचायेवं तिंख्यलय् तयातःगु निर्माण सामग्री चीकीगु जूगुलिं उकिया लागिं सुनानं आन्दोलन यानाच्वनेम्वाःगु खँ नं कनादीगु दु ।

दरवार स्कूलया निर्माण क्वचाःसां नापसं च्वंगु ललितकला क्याम्पसया मेन गेटया खँय् विवाद जुयाः भचा लिबाःगु खँ कँसें वय्कलं दरवार स्कूलयात निर्माण सामग्री याकनं चीकि धकाः थम्हं निर्देशन बीधुनागु जानकारी नं बियादिल । स्कूल व अस्पताल थेंज्याःगु जनतालिसे प्रत्यक्ष स्वापू दुगु भवन निर्माणयात राज्यं ग्वाहालि यायेमाः धकाः उमिगु सामान तिंख्यलय् तयेके बियागु खँ नं वय्कलं स्पष्ट यानादिल ।

नेवाः पत्रकार राष्ट्रिय दबूया न्हूपिं पदाधिकारीतलिसे जूगु म्हसीका ज्याझ्वलय् न्ववासें वय्कलं थ्व खँ कनादीगु खः । नेवाः पत्रकारतय्त वय्कलं मनपां यानाच्वंगु सही ज्यायात सही व गलत ज्यायात गलत हे धकाः च्वया बीत नं इनाप यानादिल । मनपां संस्थागत रुपं याःगु निर्णयया विरुद्ध थः हे उपमेयर सक्रिय जुयाच्वंगु खँय् नं वय्कलं आपत्ति प्वंकादिल ।