ने. सं. ११४६ बछलाथ्व पञ्चमी - दयावीरसिं बुदिं

बलिउड २०१९

थौं शुक्रवाः रिलिज जूगु ‘गुड न्यूज’ नांयागु हिन्दी फिल्म थुगुसीया दकलय् लिपांगु रिलिज खः । अक्षय कुमार व करिना कपुरया नापनापं कियरा आडवाणीया मू भूमिका दुगु गुड न्यूज कमेडी फिल्म खः । बलिउडय् थौंकन्हय् कमेडी फिल्मं स्वकुमिया नुगः त्यका वयाच्वंगु दु। उलि जक मखसे थ्व फिल्मया हिरो अक्षय कुमार जूगुलिं थुकियात ‘हन्ड्रेड पर्सेन्ट हिट’ धकाः बय्बय् यानातःगु दु। थुगुसी हे जक अक्षय कुमारया मिशन मंगल, हाउसफूल ४ व केशरी हिट, सुपरहिट जुइधुंकूगु दु ।

थुगुसी पिदंगु फिल्मय् ऋतिक रोशनया निगू फिल्म वार व सुपर थर्टी नं सुपर हिटया दर्जाय् लाःगु फिल्म खः । थुगुसीया टपटेन बलिउड फिल्मय् ४७० करोड भारु कमे यानाः ऋतिक रोशन व टाइगर श्राफया वार नम्बर १ पोजिशनय् लाःगु दुसा ३७७ करोड कमे यानाः शाहीद कपुर व कियरा आडवाणी दुगु ‘कबिर सिंह’ निगूगु थासय् लानाच्वंगु दु ।

अथे हे स्वंगूगु थासय् ३४२ करोड दां कमे यानाः ‘उरी : द सिर्जिकल स्ट्राइक’, ३२१ करोड कमे यानाः सलमान खान व क्याट्रिना कैफया ‘भारत’ प्यंगूगु थासय् लानाच्वंगु दु। न्यागूगु थासय् अक्षय कुमार, बबी देओल व रितेश देशमुख दुगु ‘हाउसफूल ४’, अले खुगूगु थासय् नं अक्षय कुमारया हे ‘मिशन मंगल’, न्हय्गूगु थासय् अक्षय कुमारया हे ‘केशरी’, अले च्यागूगु थासय् ‘टोटल धमाल’, गुंगूगु थासय् ‘छिछोरे’ व झिगूगु थासय् ऋतिक रोशनया ‘सुपर थर्टी’ लानाच्वंगु दु ।

थ्व धलः कथं अक्षय कुमारया स्वंगू फिल्म थुगुसी टपटेनय् लानाच्वंगु ल्याखं थुगुसीया टप स्टारय् अक्षय कुमार व निगू फिल्म थ्व धलखय् लाःगु ल्याखं ऋतिक रोशनपिं लानाच्वंगु दु। थुगुसी सलमान खानया भारत नं टप टेनय्लाःसां फिल्मयात आपाःसिनं कुंखिउँगु दुसा वंगु वालय् रिलिज जूगु सलमान खान व सोनाक्षी सिन्हाया फिल्म ‘दबंग थ्री’या बनेज्या नं गुलि बिचाः याःगु खः उलि मजुल धयागु खँ दु। थ्व ल्याखं आः स्वम्ह खान कथं बय्बय् जुयाच्वंपिं सलमान, शाहरूख व आमिरया क्रेज न्हापा थें मंत धइगु खनेदु।

थगुने दछि निदँ न्ह्यः तक राजकुमार रावया ‘स्त्री’ लगायत मेमेगु फिल्म हिट जूबलय् बयबय् जूगु खःसा आः वया आयुष्मान खुरानायात बलिउडया ‘लम्बी रेसका घोडा’या रुपय् कयाहःगु दु। ‘विक्की डोनर’ नांयागु फिल्मं थःगु पलाः न्ह्याकूम्ह आयुष्मान खुरानाया थगुने ‘अन्धाधुन’ व ‘बधाइ हाे’ थेंज्याःगु फिल्मं स्वकुमिया नुगः त्याकूगु खःसा थुगुसी ‘ड्रिम गर्ल’ व ‘बाला’ वयागु लोकंह्वाःगु फिल्म खः ।

न्हू पुस्ताया मेम्ह हिरो कथं कार्तिक आर्यन नं थौंकन्हय् लोकंह्वाना वःम्ह हिरो खः । थुगुसी वयागु ‘पति पत्नी और वह’ व ‘लुकाछिपि’ हिट फिल्म घोषित जूगु दु। स्वीदँति न्ह्यः बीआर चोपडां विद्या सिन्हा व रञ्जिता लिसे संजीव कुमारयात कयाः दयेकूगु ‘पति पत्नी और वह’या न्हूधाः यानिकि रिमेकया रुपय् दयेकूगु थ्व फिल्म नं थुगसीया हिट फिल्म खः । विकि कौशल नं थुगुसी न्हू पुस्ताया हिरो कथं न्ह्यःने वःगु दु। वयागु ‘उरी : द सिर्जिकल स्ट्राइक’ थुगुसी टप टेनय् थर्ड लानाच्वंगु फिल्म खः । थुगुसी रणवीर सिंहया नं ‘गल्ली ब्वाइ’ हिट जुल । पुलांपिं हिरोत मध्ये अनिल कपुर व जोन अब्राहमया ‘पागलपन्ती’ धाःसा फ्लप जुलसा पुलांम्ह हिरो सनी देवलं थः काय् करण सिंह देवलया डेब्यु याकूगु ‘पल पल दिलके पास’ नं फ्लप जुल । थुगुसी फ्लप जूपिं मध्ये अर्जुन कपुरया बीग बजेट फिल्म ‘पानीपत’यात थुगुसी दकलय् चर्चा जूगु तर फ्लप जूगु फिल्मया रुपय् काःगु दुसा अर्जुनया हे ‘इन्डियाज मस्ट वान्टेड’ नं फ्लप हे जुल ।

फ्लप हिरोइनतय्गु चर्चा यायेगु खःसा छगू इलय् बलिउडया क्वीन धकाः धयातःम्ह कंगना रनावटया ‘मणिकर्निका’ व ‘जजमेन्ट है क्या’ नं फ्लप हे जुलसा छगू जमानाया स्टार हिरोनी काजोलया ‘हेलिकप्टर इला’ नांयागु फिल्म नं फ्लप जुल । बरु काजोलया हे तःकेहेँ रानी मुखर्जीया ‘मर्दानी २’ धाःसा लोकंह्वाःगु दु। मेपिं हिरोइनय् तापसी पन्नू व अमिताभ बच्चनया क्राइम थ्रीलर ‘बदला’ हिट जूबलय् तापसी पन्नूया पोजिशन थहां वंगु दु। तापसी पन्नूया खाताय् ‘मिशन मंगल’ थेंज्याःगु हिट फिल्मया नां दुथ्याःसां थ्वहे फिल्मय् म्हितूपिं विद्या बालन व सोनाक्षी सिन्हापिंसं न्हाय् धस्वाकेत ताःलात । न्हू पुस्ताया खँ ल्हायेगु खःसा अजय देवगनलिसे ‘दे दे प्यार दे’ म्हितूम्ह राकुल प्रित सिंह व शाहीद कपुरलिसे ‘कविर सिंह’ म्हितूम्ह कियरा अडवाणीया नां न्ह्यःने वःगु दु ।

थगुने थगुने तसकं बय्बय् जुयाः नं फ्लप जूगु फिल्मय् शाहरूख खानया ‘जिरो’ व आमिर खान, अमिताभ बच्चनया ‘ठग्स अफ हिन्दूस्तान’या नां न्ह्यःने वःथें थुगुसी ‘जोधा अकबर’ थेंज्याःगु भव्य फिल्म दयेकूम्ह निर्देशक आशुतोष गोवारीकरया ‘पानीपत’ या नां न्ह्यःने लाःवःगु दु। अथेहे तुं ‘स्टुडेन्ट अफ इयर २’, ‘जजमेन्टल है क्या’, ‘मरजावां’ थेंज्याःगु फिल्म नं बय्बय् जुयाः नं फ्लप फिल्मया धलखय् लाःगु दु। अथेहे तुं संजय दत्त व माधुरी दीक्षितं ताःई लिपा नापं म्हितूगु धकाः बय्बय् जूगु ‘कलंक’ नं फ्लप हे जुलसा संजय दत्तं थःगु महत्वाकांक्षी फिल्म धकाः बय्बय् याःगु ‘प्रस्थानम्’ नं फ्लप हे जुल । थ्व फिल्म फ्लप जूबलय् मनिषा कोइरालां छम्ह क्यारेक्टर एक्ट्रेसया रुपय् न्ह्याके धकाः ग्वःगु ग्वसाः नं ताःलाये मफुत ।

बक्स अफिस क्वीन धकाः धयातःम्ह प्रियंका चोपडा इहिपा यानाः विदेशय् च्वनाच्वंगुलिं हिन्दी फिल्मय् उलि नुगः क्वसायेका च्वंगु मदुसा ताःई लिपा कमब्याक हे रुपय् ‘द स्काइ इज पिंक’ फिल्मय् न्ह्याकूगु पलाः नं ताःलाये मफुतसा हिट हिरोइनया दर्जाय् लानाच्वंपिं भूमि पेडनेकर व तापसी पन्नू ‘साँड कि आँख’ फ्लप हे जूगु फिल्म खः ।

थुकथं थुगुसी हिट व फ्लप फिल्मया ल्याः स्वयेबय् बलिउडय् आः स्टार व स्टारडमया अर्थ हिला वयाच्वंगु खनेदुसा फिल्मय् नं न्हापा थेंज्याःगु मसाला फिल्म मखसे ड्रिम गर्ल, बाला, देदे प्यार दे थेंज्याःगु बिस्कं सवाःया फिल्मं स्वकुमिया नुगः त्याका वयाच्वंगु खनेदु ।