ओली सरकारया आः ‘दुई तिहाइ’ मदइगु सम्भावना

येँ – समाज वादी पार्टीं सरकार त्वःतूगु दु । म्हिगः च्वंगु संसदीय दलया बैठकं उगु निर्णय याःगु खँ पार्टीया सहअध्यक्ष राजेन्द्र श्रेष्ठं ‘नेपालभाषा टाइम्स’ यात कनादिल । दलया बैठक न्ह्यः पार्टीया शीर्ष नेतातय् बैठक च्वंगु खः । उगु बैठकया निर्णय कथं संसदीय दलया बैठकं सरकार त्वःतेगु निर्णय याःगु खः ।

संसदीय दलया निर्णय लिपा हे पार्टीया अध्यक्ष लिसें उपप्रधान तथा कानुन मन्त्री उपेन्द्र यादवं प्रधानमन्त्री ओलीयात राजीनामा लःल्हानादीगु खः । न्हापा थःपिं सरकारय् वने न्ह्यः जूगु सहमति सरकारं एकपक्षीय रुपं भंग याःगु धासें आः सरकारय् च्वनेगुया औचित्य मदुगु खँ सहअध्यक्ष श्रेष्ठं कनादीगु दु । समाजवादी पार्टीपाखें अध्यक्ष उपेन्द्र यादव उपप्रधान लिसें कानुन मन्त्री जुयाच्वनादीगु खः । थ्व स्वयां न्ह्यः वय्कः स्वास्थ्यमन्त्री जुयाच्वंगु खः। प्रधानमन्त्री केपी ओलीं मन्त्रिपरिषद पुनर्गठन याःबलय् वय्कःयात स्वास्थ्य मन्त्रालयं चीकाः कानुनमन्त्री दयेकूगु खःसा छम्ह राज्यमन्त्री नं लिकाःगु खः ।

संविधान संशोधन यायेगु सहमति कथं समाजवादी पार्टी सरकारय् वंगु खः । तर प्रम ओलीं संविधान संशोधनय् चिउताः तयामदी । म्हीग च्वंगु मन्त्रिमण्डलया बैठकय् नं उपप्रधानमन्त्री यादवं संविधान संशोधन यायेगु निंतिं प्रस्ताव दर्ता याःगु खःसां प्रमं उकियात तप्यंक अस्वीकार यानादीगु खः । वयां लिपा म्हिगः समाजवादी पार्टीं सरकार त्वःतेगु निर्णय याःगु खः ।

आः नकतिनि राष्ट्रिय सभाया सांसद ल्ययेत जुइगु चुनावय् नेकपां समाजवादीयात त्वःताः राजपालिसे चुनावी तालमेल याःगु कारणं नं समाजवादी ओली खनाः तम्वयाच्वंगु खः ।

समाजवादीं सरकार त्वःतूसां सरकारयात बियातःगु समर्थन लित कायेगु वा मकायेगु धइगु निर्णय धाःसा थौं जक याइ धाःगु दु । समर्थन लित काःसा ओली सरकारयात ‘दुई तिहाइ’ प्राप्त जुइ मखु ।

यादवं बीत्यंगु बन्द खाम
उपप्रधान तथा कानुनमन्त्री उपेन्द्र यादवं सोमवाः च्वंगु मन्त्रिपरिषद् बैठकय् संविधान संशोधनया प्रस्ताव दर्ता यायेत प्रधानमन्त्रीयात थःगु छगू प्रस्ताव दु धकाः बन्द खाम टेबुलय् तयादीगु खः । प्रमं खाम खनेवं ‘छु प्रस्ताव खः ?’ धकाः न्यनेधुंकाः उपप्रम यादवं ‘संविधान संशोधन बारे खः’ धकाः लिसः बियादिल । लिसः न्यनेवं प्रमं ‘स्टप इट’ धासें मन्त्री यादवयात खाम तकं चायेके मबिउगु खः । सूत्रं धाः कथं उपप्रम यादवं अन बीत्यंगु बन्द खामय् संविधान संशोधनया निंतिं संविधानविद् वा सर्वोच्च अदालतया पुलांपिं न्यायाधीशतय्गु विज्ञ पुचः दयेकेगु प्रस्ताव यानातःगु खः ।

नेपालभाषा टाइम्स

च्वमिया मेमेगु

• नेवाः सांस्कृतिक ज्ञानकोष अनलाइनय्
• धुँ जुजु बुद्धि, म्येय्‌जवाःया बुद्धि
• अमेरिकां लित बिल खुया यंकूगु निगू मूर्ति
• नेवाः हाइकु ख्यः न्हय्‌क्वःगु बुसादँ हना
• महाकवि सिद्धिदासया बुन्हिया लसताय् चिनाखँ व किपा च्वज्या कासा