फास्ट ट्राय्कं बुंगद्यःया जात्रा बन्द जुइगु खतरा

येँ – नेपाली सेनां दयेकाच्वंगु फास्ट ट्राय्क यदि ख्वना व बुंगया लँपु जुयाः निर्माण जुल धाःसा नेपाःया नांजाःगु बुंगद्यःया जात्रा हे प्रभावित जुइगु खँ धाःगु दु। थुकियात कयाः बुंगमति जनसरोकार समितिया नकतिनि च्वंगु छगू मुँज्यां थुकिया बारे चिउताः प्वंकुसें जनप्रदर्शन समेत यायेगु निर्णय याःगु दु ।

ख्वना व बुंगया लँपु जुयाः फास्ट ट्राय्क दयेकल धाःसा अन बुंगद्यःया रथ जात्रा यायेगु लँपु, कुरुवालं बुंगद्यः हयेगु लँपु समेत मदइगु खँ समितिया नायः अष्टबहादुर महर्जनं कनादीगु दु। लिसें फास्ट ट्राय्कया लागिं बुंगद्यःलिसे सम्बन्धित थीथी गुथिया जग्गा समेत अधिकरणय् लाइगु खँ धाःगु दु। खास यानाः बुंगद्यःया पुजाआजा याइपिं पाञ्जुपिनि खान्की गुथिया जग्गा फुक्कं फास्ट ट्राय्कय् लाइगु जुयाच्वंगु दु। यदि खान्की गुथिया जग्गा मंत धाःसा पाञ्जुपिंत आर्थिक समस्या जुयाः बुंगद्यःया सुसाःकुसाः यायेगु व जात्रा चले यायेगु ज्याय् सरिक जुइत तकं थाकुइगु खँ नं धाःगु दु। थुकिया लिच्वः कथं अन्ततः बुंगद्यःया जात्रा हे चले याये मफइगु अवस्था वइगु खँ धाःगु दु ।

थुकिया हे बारे सर्वसाधारणया ध्यान सालेगु लागिं कन्हय् मंगलवाः येँय् छगू प्रदर्शन यायेत्यनागु खँ नं नायः महर्जनं कनादिल । बुंगद्यःया जात्रा बचे यायेत राज्ययात दबाब बीगु लिसें फास्ट ट्राय्कपाखें नेपाःया संस्कृतिइ हे लिच्वः लाकीगु खतरा बारे सचेतना थनेत थनया फिब्वख्यः-माइतीघर मण्डलाय् मंगलवाः सुथय् १० बजे प्रदर्शन यायेत्यंगु खः । सुथय् बाजं सहित बुंगद्यःया भोटो जात्रा जुइगु जावलाख्यलय् मुनाः माइतीघर मण्डलाय् थ्यंकः वयेगु व अन थीथी कथंया ब्यानर ब्वयेगु ज्याझ्वः दयेकातःगु दु ।