कायेधुंकूगु बिमा दां लित बीमालीगु जुल

येँ – उच्च अदालत यलं चौधरी ग्रुपयाके युनाइटेड इन्स्योरेन्स कम्पनीया २४ करोड तका असुल यायेत बिमा समितियात पौ च्वःगु दु । अदालतं बिमा समिति विरुद्ध सीजी ग्रुपं तःगु मद्दाया पूर्ण पाठ तयार यासें चौधरी ग्रुपयाके २४ करोड तका असुल यायेत धाःगु खः । २०६९ असोज २९ गते येँया सतुंगलय् च्वंगु सीजी अन्तर्गतया प्यंगू इलेक्ट्रोनिक्स उद्योगया गोदामय् मी नयेधुंकाः चौधरी ग्रुपं युनाइटेड इन्स्योरेन्स्पाखे ५८ करोड भुक्तानी काःगु खः । तर लिपा बिमा समितिइ उजुरी लायेवं समितिं छानविन यायेगु झ्वलय् ३४ करोड जक क्षति जूगु खने दुगु प्रतिवेदन बिउगु खः ।

समितिया प्रतिवेदन विरुद्ध चौधरी पुचलं तत्कालिन पुनरावेदन अदालत यलय् मुद्दा तःगु खः । तर अदालतं बिमा समितिया निर्णययात हे सदर यानाबिउगु खः । तर पूर्ण पाठ धाःसा छ्वया महःनिगु खः । तर मंगलवाः अदालतं पूर्ण पाठ समितिइ छ्वःगु दु । सीजी ३६ करोड व २२ करोड यानाः ५८ करोड भुक्तानी काःगु खः । अदालतया थ्व निर्णय कथं आः चौधरी ग्रुपं थम्हं कया तयेधुंकूगु २४ करोड तका युनाइटेड इन्स्योरेन्सयात लित बीमालीगु जूगु दु ।