निःशुल्क पार्किङ अस्तव्यस्त
दिलिप शाही
येँ÷येँ मनपां न्हू सतकय् पार्किङ चीकाः धरहराय् व्यवस्था याःगु पार्किङ क्षेत्र तसकं चाप अप्वयाः अस्तव्यस्त जूवंगु दु । अन तयातःगु पार्किङया माक्व व्यवस्थापन मजूगु कारणं अफिस इलय् पार्किङं पिहां वइपिं व पार्किङय् वनीपिं मनूतय् भिडं मनूतय्त तसकं थाकुयाच्वंगु दु । पार्किङ स्वयेगु लागिं निम्ह जक गार्ड तयातःगु दुसा उमिसं व्यवस्थापन याये मफुगु अवस्था अन खनेदु ।
अन पाः च्वनीम्ह नगर प्रहरीयात ‘थन थुभनं अस्तव्यस्त छाय् ?’ धकाः न्यनाबलय् वय्कलं ‘च्वय् न्यनादिसँ’ धकाः लिसः बियादिल । थःपिं निम्ह जक दुगु जुयाः दुने निं स्वये ला, पिने रसिद निं काये ला थें जुइगु खँ कँसें थन ज्या यायेत हे थाकुयाच्वंगु खँ वय्कलं कनादिल ।
अनया अस्तव्यस्त दथुइ पार्किङ याः वंम्ह न्हू बानेश्वरया सरोज अधिकारीं थःगु बाइक छगू थासय् पार्किङ यानाथकागु खःसां लिपा बाः काः वनाबलय् बाइक हे मात्तुमाः वनेमाःगु खँ कनादिल । वय्कलं धयादिल, ‘लिहां वयाबलय् बाइक तयाथाय् मदु । गन सारे यात धकाः माः जुइ माल । थःगु बाइक मालेत हे झिगू मिनेट माल ।’
महानगरपालिकां सितिकं पार्किङया व्यवस्था याःगु बांलाःगु ज्या खःसां नं भद्रगोल जूगुलिं पार्किङ याः वइपिंसं तसकं सास्ति फयेमालाच्वंगु खँ वय्कलं कनादिल ।
अधिकारीं धयादिल, ‘छगू ला थन खिउँसे च्वं । मत छप्वाः हे तयातःगु मदु । छथाय् बाइक तयाः वन धाःसा लिहां वयेबलय् बाइक मेथाय् तयातयेधुंकी । बाइक मालेत मोबाइलया लाइट च्याकेमाः । अझ धुलं हाकनं मेगु हे सास्ति याइ तिनि ।’
सितिकं बाइक तयेगु व्यवस्था बांलाःगु खःसां नं उकिया व्यवस्थापन धाःसा मजूगु खँय् थँबहीया उमेश श्रेष्ठं नं असन्तुष्टि प्वकादिल । वय्कलं धयादिल, ‘निम्ह कर्मचारी पिने हे व्यस्त जुयाच्वंगु दु, दुने छम्ह हे कर्मचारी मदु । पार्किङ याइपिसं नं बांलाक पार्किङ मयाःगुलिं थ्व समस्या जुयाच्वंगु खः । पार्किङ याइपिंसं मेपिंत मछिं मजुइक पार्किङ यायेगु खःसा थुलि भद्रगोल मजुइगु खइ ।’
धराहरा पार्किङ दुने गुलि बाइक वः धकाः न्हिथं तथ्यांक कायेगु यानाच्वंसां नं उकथंया कर्मचारी व्यवस्थापन धाःसा जुयाच्वंगु मदु । पार्किङ याः वइपिंत नगर प्रहरीं चिट बीगु खँय् धाःसा बाइक चालकतय्सं सकारात्मक प्रतिक्रिया बिउगु दु । पार्किङ वनीपिंसं चिट कायेमाःसा पार्किङं लिहां वनेत्येकाः चिट लित बीमाः । थुकिं यानाः बाइक तनिगु समस्या म्हो जुइगु खँ धाःगु दु ।
LEAVE YOUR COMMENTS