स्लोभाकियायात ५–० गोलं बुकाः स्पेन निगूगु चरणय्

येँ – स्लोभाकिया विरुद्ध ५–० या शानदार विजय चूलाकुसें स्पेन युरो कपया निगूगु चरणय् दुहां वंगु दु । बिहिवाः बहनी लिबाक्क जूगु कासाय् स्पेन याःगु न्यागू गोल थुगुसीया युरो कपय् छगू हे कासाय् जूगु आःतकया दकलय् अप्वः गोल खः । थ्वयां न्ह्यः जर्मनीं व डेनमार्कं छगू हे कासाय् प्यंगू प्यंगू गोल यायेधुंकूगु दु ।

स्पेनया न्यागू गोलय् निगू गोल आत्मघाती कथं उपहारय् वःगु जुल । स्लोभाकिया विरुद्ध स्पेन दबाबय् तयातःसां गोल याये मफयाच्वंगु अवस्थाय् न्हापांगु गोल आत्मघातीया रुपय् वःगु खः । थ्वयां न्ह्यः स्पेनयात पेनाल्टिया ह्वःताः नं वःगु खः, तर मोराटां थ्वाःगु गोल स्लोभाकिया गोलकिपर डुब्राभकां पनाबिउगु खः । पेनाल्टि पनाः हिरो जूम्ह डुब्राभकां थ्वयां छुं मिनेट लिपा हे स्लोभाकियाया निंतिं भिलेन जुयाबिल । कासाया ३० औं मिनेटय् बलयात क्लियर यायेत भलि थ्वायेगु निंतिं पोस्टया बार च्वये ल्हाः छ्वयाः पञ्च यायेत स्वःगु बल कुहां वयाः पोस्टय् दुहां वनाबिल । थ्व हे गोलं स्पेनं अग्रता कालसा न्हापांगु हाफया इन्जुरी इलय् लापोर्टें गोल यासें स्पेनयात न्हापांगु हाफय् हे निगू गोलं अग्रता बिल ।

मोराटाया पेनाल्टि असफल जुइवं थुगुसीया युरो कपय् निगू पेनाल्टि मिस याःगु स्पेन न्हापांगु टिम जूगु दु । थ्वयां न्ह्यव पोल्यान्डविरुद्धया कासाय् नं स्पेनं पेनाल्टि मिस याःगु खः ।

निगूगु हाफय् स्पेनया निंतिं सार्बियां छगू, फेरान टोरेसं छगू गोल यातसा स्लोभाकिया डिफेन्डर कुकां आत्मघाती गोल यानाबिल ।

स्लोभाकिया विरुद्ध शान्दार विजय चूलाकेवं स्पेन निगूगु चरणय् दुहां वनेत ताःलाःगु दुसा स्लोभाकिया धाःसा यक्व गोल अन्तरं बूगुलिं निगूगु चरणय् दुहां वनेमखनीगु जूगु दु ।

मेखे स्वीडेन व पोल्यान्ड दथुया कासा स्वीडेन ३–२ गोलं त्याकाः निगूगु चरणय् दुहां वंगु दु । पोल्यान्डयात बुकेवं स्वीडेन समूह इ पाखे ७ अंक सहित शीर्षस्थानय् थ्यंगु खःसा स्पेनया ५ अंक जूगु खः ।

सम्बन्धित बुखँ

LEAVE YOUR COMMENTS