थौं महराया भाग्य निर्धारण

येँ – थःगु हे सचिवालयय् ज्या याइम्ह मिसाम्ह कर्मचारीयात बलात्कारया द्वपं लाःम्ह पुलांम्ह सभामुख कृष्णबहादुर महराया मुद्दाय् थौं फैसला याइगु जूगु दु । येँ जिल्ला न्यायाधीश अम्बरराज पौडेलया इजलाशं लिपांगु सुनुवाइ याःगु खः । म्हिगः सुनुवाइ क्वचाःगु खःसां नं ई मगानाः फैसला जुइ मफुगु खँ स्रेस्तादार आनन्द श्रेष्ठं कनादीगु दु ।

वंगु कार्तिक १४ गते महरा विरुद्ध जिल्ला अदालत येँय् मुद्दा दर्ता जूगु खः । महरा विरुद्ध सरकारी वकिलपिंसं बहस याःगु खःसा महराया पक्षय् वरिष्ठ अधिवक्ता रमण श्रेष्ठ, भीमार्जुन आचार्य, शेरबहादुर केसी, कृष्णप्रसाद सापकोटा, सविता भण्डारी, लव मैनाली, मुरारी सापकोटां बहस याःगु खः ।

वंगु असोजया न्हापांगु वालय् महरायात संसद सचिवालयय् हे ज्या याइम्ह रोशनी शाहीं यौन दुव्र्यवहार याःगु द्वपं बिउगु खः । उगु द्वपं लिपा महरां असोज १४ गते सभामुख पदं राजीनामा बिउगु खःसा असोज १९ गते सभामुखया सरकारी निवासं हे महरायात प्रहरीं ज्वंगु खः । थौंकन्हय् महरायात डिल्ली बजार कारागारय् तयातःगु दु । वय्कलं अन सुयातं नापलाना मदीसा पार्टीया मनूतय्सं नं वय्कःयात नापलाः मवं ।

सम्बन्धित बुखँ

LEAVE YOUR COMMENTS