राजधानीया स्कुलत तत्काल मचायेकेगु निर्णय

येँ (नेपालभाषा टाइम्स) – कोरोना संक्रमणया कारणं बन्द जुयाच्वंगु धमाधम चायेकेगु याना हःसां येँ मनपां धाःसा राजधानी येँ देय्या स्कुलत आः तत्काल मचायेकेगु निर्णय याःगु दु। म्हिगः च्वंगु येँ मनपा शिक्षा विभागया मुँज्यां थ्व निर्णय याःगु खः । बैठकय् येँया सीडीओ लिसें विपद्व्य वस्थापन, कोरोना नियन्त्रण समिति आदि थीथी निकायया प्रतिनिधितय्गु उपस्थिति दुगु खः ।

कोरोना रोकथामया लागिं सरकारं लागू यानातःगु नियमत छुं भचा त्वःता हःसां कोरोनाया जोखिम धाःसा अझं कायम हे जुयाच्वंगु कारणं तत्काल स्कुल चायेकेगु पाय्छि जुइ मखु धइगु निर्णय बैठकं याःगु खः । मनपा शिक्षा विभागया प्रमुख नमराज ढकालं कनादी कथं थौंकन्हय् चिकुलां ख्वाउँ नं अप्वयाच्वंगु कारणं कोरोनां कइगु सम्भावना अझ यक्व दुगु जुयाः स्कुल चायेकेगु सम्भावना मदुनि धइगु निष्कर्ष बैठकं पिकाःगु खः ।

येँ देय् दुने छुं छुं स्कुलत चायेका हयेधुंकूगु सन्दर्भय् धाःसा मनपां अज्याःगु स्कुलया अनुगमन यायेगु निर्णय याःगु दु । यदि स्वास्थ्य सम्बन्धी मापदण्ड पूवंक पालना यानाच्वंगु दुसा अज्याःगु स्कुलयात चायेके बीगु व मापदण्ड पालना यानाच्वंगु मदुसा चालाच्वंगु स्कुल नं बन्द याकेगु निर्णय बैठकं याःगु दु । थुकिया लागिं याकनं अनुगमन शुरु यायेगु खँ धाःगु दु । लिसें आः अनलाइन शिक्षायात अझ क्वातुका यंकेगु धकाः नं निर्णय याःगु दु ।

कोरोना महामारीं यानाः बन्द जुयाच्वंगु स्कुल चायेकेगु सवालय् थीथी थासं खँ वयाच्वंगुलिं मनपा शिक्षा विभागया मुँज्या च्वंगु खः । यल जिल्लाया स्कुल पुसं चायेकेगु धकाः निर्णय जुइवं येँय् उकिया दबाब लाःगु खः । येँया छुं छुं स्कुलतय्सं धाःसा बछि जक विद्यार्थी सःताः कक्षा कायेगु यानाच्वंगु दुसा गुलिखे स्कुलतय्सं सुथय् ६ बजेनिसें जा तकं थःपिंथाय् हे नकेगु व्यवस्था यानाः न्हिछि हे कक्षा कायेगु यानाच्वंगु खँ सीदुगु दु । स्वास्थ्य मापदण्ड लागू याःसां मस्तय्त पालना याकेत थाकुइगु खँ विज्ञतय्सं धायेगु यानाच्वंगु दु ।

सम्बन्धित बुखँ

LEAVE YOUR COMMENTS