न्यागू हिमालय् न्हापांखुसी सफल आरोहण

येँ – सात हजार मिटर स्वयां म्हो उचाइ दुगु न्यागू हिमालया न्हापांखुसी सफल आरोहण जूगु दु । पर्यटन विभागया कथं खुम्बु क्षेत्रया महालंगुर हिमश्रृंखलाय् लाःगु ६ हजार ७६४ मिटर तजागु हांगु (सुरा पिक), ६ हजार ८३३ मिटर तजाःगु हुङ्कु चुली, दोलखाया रोल वालिङ क्षेत्रय् लाःगु ६हजार ६५९ मिटरया लिङ्कु चुली, गोरखाया मानसिरी हिमश्रृंखलाय् लाःगु ६६२० मिटरया पान्पोचे (प्रथम) व ६५०४ मिटरया पान्पोचे (दोस्रो) हिमाल न्हापांगुखुसी आरोहण जूगु खः ।

थुपिं न्यागुलिं हिमालया सफल आरोहण विदेशी आरोहीतय्सं याःगु खः । मेखे गोरखाया ८१६३ मिटर तजाःगु मनास्लु हिमालय् गयेत १८८ म्ह आरोहीत ताःलाःगु दु । मनास्लु हिमाल गयेत पर्यटन विभागपाखें २६४ म्हेसितं अनुमति काःगु खःसा १८८ म्हेसिनं वंगु महिनाय् सफल आरोहण याःगु खः ।

विभागया होमस्टे तथा पर्वतारोहण विभागया कथं नेपाः सरकारं खुल्ला यानाः ४१४ गू हिमाल मध्ये आः ७६ गू हिमाल जक आरोहण याये ल्यंदनि

थ्व हिमाल गयेगु निंतिं अनुमति काःपिं मध्ये १४२ म्ह मिजंत व ४६ म्ह मिस्तय्सं सफल आरोहण याःगु खः । उपिं लिसें १६५ म्ह नेपाली गाइडतसें नं हिमालया सफल आरोहण याःगु खः । मनास्लु हिमाल गयेगु निंतिं ४४ गू देय्या आरोहीतय्सं अनुमति काःगु खःसा ४० गू देय्या आरोहीत सफल जूगु खः ।

सफल आरोहण याःपिं मध्ये चिनियाँ आरोहीतय् ल्याः दकलय् अप्वः दुगु खँ धाःगु दु । सोमवाः तकया तथ्यांक कथं थ्व मौसमया निंतिं जक विभागपाखें ५३ गू हिमाल गयेगु निंतिं ६२ गू देय्या १२१० म्ह आरोहीतय्सं अनुमति काःगु दु । आरोहण अनुमति काःगु हिमाल मध्ये सगरमाथा, ल्होत्से व नुप्सेय् आरोहण जुइमफुतसा मेमेगु हिमालय् आरोहण जुयाच्वंगु खँ विभागं धाःगु दु ।

मनास्लु आरोहणया झ्वलय् पोल्यान्डया ५० दँया रीता डोनेटा ब्लाङ्य व हिमलुङ हिमाल आरोहणया झ्वलय् स्पनेया ४८ दँया फर्नान्डो सान्चेज घासा सीगु खँ विभागं धाःगु दु । विभागया होमस्टे तथा पर्वतारोहण विभागया निर्देशक मिरा आचार्यया कथं नेपाः सरकारं खुल्ला यानाः ४१४ गू हिमाल मध्ये आः ७६ गू हिमाल जक आरोहण याये ल्यंदनि । थ्व मौसमय् हिमाल गयेगु अनुमति बियाः जक खुगू करोड ५१ लाख तकां मल्याक राजश्व मुंकूगु खः ।

सम्बन्धित बुखँ

LEAVE YOUR COMMENTS