देउवायात प्रम मदयेकेत कांग्रेस दुने हे कुतः

येँ – संसद पुनस्र्थापना लिपा देशय् हानं छक्वः संसदीय चलखेल शुरु जूगु दु । थ्व चलखेलय् नेपाली कांग्रेसया भूमिका निर्णायक जुइगु जुयाच्वंगु दुसा थ्वहे इलय् कांग्रेस दुने शुरु जूगु आन्तरिक कचवंया कारणं धाःसा पार्टीयात देय्या समस्यापाखे स्वयां नं थःगु हे समस्या दुने तक्यंका बीगु सम्भावना अप्वया वःगु दु ।

संसद पुनस्र्थापना लिपा कांग्रेसलिसे सत्ता साझेदारी यायेया लागिं विभाजित नेकपाया ओली पुचः व दाहाल–नेपाल पुचःपाखें इनाप याः वयेधुंकूगु दु । तर कांग्रेसं आः तक थुकिया लिसः बिउगु मदुनि । पार्टीया केन्द्रीय समिति बैठक च्वनाः जक थुकिया निर्णय यायेगु खँ पार्टी सभापति शेरबहादुर देउवां धयादीगु दु ।

उखे कांग्रेस पार्टी दुने धाःसा थ्व इलय् कांग्रेस सरकारय् वने जिउ लाकि मजिउ धइगु मेगु विवाद पिहां वःगु दु । देउवाया विरोधी पक्ष रामचन्द्र पौडेल, शशांक कोइराला लिसें गगन थापा समेतं थ्व इलय् कांग्रेस सरकारय् वने मजिउ धकाः लबिङ शुरु याना हःगु दु । कांग्रेसयाके मुक्कं ६३ सिट जक दुगु जुयाः कांग्रेसयात जनतां सरकारय् वनेगु म्याण्डेट बिउगु मदु धइगु मत उमिसं तयाच्वंगु दु । तर देउवा विरोधी नेतातय्सं अथे धयाच्वंगुया कारण धाःसा जनताया म्याण्डेट मखुसें आः भाद्रं जुइ धाःगु कांग्रेसया महाधिवेशन खः ।

छुं जुयाः देउवा प्रधानमन्त्री जुयाः उगु महाधिवेशन यात धाःसा वय्कलं मेपिनि पत्ता साफ यायेफु धइगु ग्याःचिकु मेगु पक्षया नेतातय्के वनाच्वंगु दु । उकिं उमिसं देउवायात प्रधानमन्त्री जुइगुपाखें पनेगु लागिं कांग्रेस सरकारय् वने मजिउ धकाः लबिङ यानाच्वंगु खः ।

कांग्रेस दुने छखे थज्याःगु विवाद ब्वलंगु दुसा मेखे आः विभाजित जुल धाःगु नेकपा हानं छधी जुयाः वयेफु धइगु ग्याःचिकु नं कांग्रेसयात जुयाच्वंगु दु । ओली व नेपाल–दाहाल गुटं पार्टी तज्यायेधुंकल धाःसां नं निर्वाचन आयोगं उकियात मान्यता मबिउनि, मेखे पार्टीया छथ्वः नेतात हानं पार्टी एकताया लागिं ब्वाँय् जुयाच्वंगु दु । थज्याःगु अवस्थाय् कन्हय् छुं जुयाः नेकपा हानं छप्पँ जुल धाःसा कांग्रेस हथाय्चाःगुया अर्थ दइ मखु धइगु बिचाः नं पार्टी दुने ब्वलनाच्वंगु दु ।

नेपाल–दाहाल पुचलं ओली पक्षया हे छुं सांसदतय्त थःपाखे सालाः जसपालिसे जानाः सरकार दयेकेगु कुतः यानाच्वंगु जानकारी वःगु कारणं देउवां नेपाल पक्षयात क्वातुक लिसः मबिउगु खँ नं सूत्रं धाःगु दु ।

सम्बन्धित बुखँ

LEAVE YOUR COMMENTS