अरुण तेस्रो आयोजनाया ज्या तीव्र रुपं न्ह्यात

येँ – राष्ट्रिय गौरवया अरुण तेस्रो जलविद्युत आयोजनाया ज्या तीव्र रुपं न्ह्यानाच्वंगु खँ सीदुगु दु । वंगु वैशाख २९ गते प्रधानमन्त्री केपी शर्मा ओलीं व भारतीय प्रधानमन्त्री नरेन्द्र मोदीं मंकाः कथं शिलान्यास याःगु आयोजना तीव्र गति न्ह्यानाच्वंगु खँ धाःगु दु । १ खर्ब ४ अर्ब तुइगु अनुमान यानातःगु आयोजना भारतीय सरकारी आयोजन सतलज हाइड्रों दयेकाच्वंगु खः ।

सम्झौता कथं अरुण तेस्रो आयोजनाया ज्या सन् २०२२ तक क्वचायेकेमाः । सतलज निर्माण शुरु याःगु गुलाया दुने थ्यंमथ्यं १५ प्रतिशत ज्या क्वचायेके धुंकूगु खँ धाःगु दु । आयोजनां दक्वं ज्या छक्वलं न्ह्याकूगुलिं याकनं ज्या जुयाच्वंगु खँ धाःगु दु । आयोजनां इलय् ज्या क्वचायेकेत ड्याम दयेकेगु निंतिं पावर हाउस व उकिया निंतिं माःगु सडक संरचना दयेकेगु ज्या जुयाच्वंगु व छुं नं कथंया पंगः मवल धाःसा क्वःछिनातःगु इलय् ज्या पूवनीगु खँ धाःगु दु ।

मुख्य सुरुङ तक थ्यंकेत दोभानय् दयेका च्वंगु प्रवेश सुरुङ मार्गया ५ सय ९ मिटर लम्बाइ मध्ये ३ सय ४७ मिटर दयेकेगु ज्या क्वचायेधुंकूगु खँ आयोजनां धाःगु दु । प्यंगु सुरुङया ज्या क्वचायेधुंकाः मेगु च्यागू थासं सुरुङ दयेकेगु ज्या न्ह्याकेगु तयारी जुयाच्वंगु दु । आयोजनाया कथं बाँध दयेकेत १३ सय व पावर हाउस दयेकेत ११ सय यानाः २४ सय मजदुरतय्सं ज्या यानाच्वंगु दु ।

९ सय मेगावाटया थुगु आयोजन दयेकेगु ज्या क्वचाल धाःसा २१ दशमलव ९ प्रतिशत मत नेपाःयात दइसा मेगु भारतं यंकीगु खँ धाःगु दु । नीन्यादँ तक भारतं मत उपभोग यायेधुंकाः उगु आयोजना नेपाः सरकारया स्वामित्वय् वइगु खँ धाःगु दु । आयोजनाया कथं प्रशारण लाइन दयेकेगु ज्या नं न्ह्यानाच्वंगु दु । उगु प्रशारण लाइन महोत्तरीया ढल्केवार शव स्टेशनय् ४ सय केबी राष्ट्रि प्रशारण लाइनय् स्वाइगु खँ धाःगु दु ।

सम्बन्धित बुखँ

LEAVE YOUR COMMENTS