जैसिदेवलय् जनबहाःद्यःयात पताः छाल

येँ – जनबहाःद्यः सालेगु झ्वलय् म्हीग जैसिदेगलय् रथयात पताः छायेगु व विशेष पुजा ज्या जुल । जैसिदेगलय् रथ थ्यनेवं दँय्दसं थथे विशेष पुजा यायेगु याना वयाच्वंगु खः । जैसिदेगलय् रथ थ्यनेवं किसलीसहित तयाः द्यः पुज्यानाः २० मिटर ताःहाकःगु पञ्चरंगी न्यापु पताः छाःगु खः । अथेहे रथया गजुलिं चतांमरि, यःमरि, ल्वंचामरि नं छाःगु खः । देशय् वयेफुगु संकट, विनाश मोचन जुयाः राज्य व जनताया सुख, शान्ति, समृद्धि, सुस्वास्थ्य व दीर्घायुया कामना यासें जैसीदेवल युथ क्लबं दँय्दसं थथे जनबहाःद्यःयात पताः छायाः विशेष पुजा याना वयाच्वंगु खः । पुजा ज्याझ्वलय् स्थानीय हनेबहःपिं, क्लबया पदाधिकारीपिं, समाजसेवीपिनि उपस्थिति दुगु खः ।