महानगर दिवस न्यायेकेगु तयारी

येँ – येँ महानगरपालिकां २५ क्वःगु महानगर दिवस न्यायेकीगु जूगु दु । थ्वहे वइगु मंसिर २९ गते छगू ज्याझ्वः यासें महानगर दिवस न्यायेकेत्यंगु खः । यँ नगरपालिकायात सरकारं ‘महानगर’ घोषणा याःगु न्हियात लुमंकाः दँय्दसं थ्व दिवस न्यायेका वयाच्वंगु खः ।

म्हिगः च्वंगु महानगरपालिकाया बोर्ड बैठकं थ्व निर्णय याःगु खः । लिसें बैठकं थुकिया लागिं छगू तयारी समिति नं गठन याःगु दु ।
बैठकं येँ मनपा २९ वडाय् लाःगु युनाइटेड बहुउद्देश्यीय सहकारीयात ‘समस्याग्रस्त सहकारी’ घोषणा यायेगु निर्णय नं याःगु दु । उगु सहकारीया सञ्चालक फुक्कं बिसिउँ वंगु जुयाः मनपां उकियात समस्याग्रस्त घोषणा याःगु खः ।

सरकारं २० दँ पुलांगु गाडी चीकेगु धकाः निर्णययात लसकुस यासें उकिया थासय् सरकारं विद्युतीय व यक्व मनू न्ह्यनीगु गाडी झिके यायेत नं इनाप याःगु दु । अथे हे येँ मनपाया प्रशासन प्रमुख पदय् नमराज ढकालयात नियुक्त याःगु दु । उगु पदय् दुम्ह ज्ञानेन्द्र कार्कीयात सामान्य प्रशासन मन्त्रालयं थःथाय् साला काःगुलिं खाली जूगु पदय् ढकालयात नियुक्त याःगु खः ।