ने. सं. ११४४ कछलागा द्वादशी -

बिस्काःया निंतिं कार्यदल

ख्वपया प्रसिद्ध बिस्काः जात्रा व्यवस्थित व शान्तिपूर्ण रुपं न्यायेकेत थीथी ज्याकूया प्रमुख, स्थानीय बुद्धिजीवी व संस्कृतिप्रेमी भेलां ख्वप नगरपालिकाया प्रमुख सुनील प्रजापतिया संयोजकत्वय् झिंछम्हेसिया विशेष कार्यदल गठन याःगु दु ।

उगु भेलां नगरपालिकां माइकिंग, सूचनाा प्रवाह, पर्चा, पम्पलेट पिथनेगु व नगरवासीयात थीथी गतिविधिपाखें शान्तिपूर्ण रुपं जात्रा संचालन यायेत इनाप यायेगुलिसें नगरन्यंकं जात्रा संचालन जुइगु लागाया सुचुकुचु यायेगु, जिल्ला प्रशासन ज्याकू व मातहतया दक्वं सुुरक्षा निकायं जात्रा जःछि सुरक्षा व्यवस्थायात प्रभावकारी दयेकेगु, गुथि संस्था, भैरवनाथ जात्रा सहयोग समिति लगायत सम्बन्धित संस्थां इलय् हे शान्तिपूर्ण व व्यवस्थित रुपय् जात्रा संचालन यायेत आवश्यक तयारी यायेगु, नेपाल विद्युत प्राधिकरण, नेपाल टेलिकम, केबुल नेटवर्क व इन्टरनेट सेवा प्रदायक संस्थां जात्रा संचालन जुइगु लागाय् थःथःगु तार व लठ्ठा व्यवस्थित यायेगु व नगरपालिकाया जनप्रतिनिधि, सुरक्षा निकाय, थीथी संघसंस्थाया प्रतिनिधि, ब्वनेकुथि, कलेज व स्थानीय जनताया व्यापक सहभागिताय् ¥याली व सभा यायेगु निर्णय याःगु दु ।

भेलाय् सहभागि जुयादीपिंसं आन्तरिक व बाह्य पर्यटकतकं जात्रा स्वयेत वइगु जूगुलिं बिस्काः जात्रा संचालनया निंतिं सरोकारवाला निकायया दथुइ समन्वया व सहकार्य जुइमाःगु खँय् बः बिउगु दु ।

इमिसं गुथि संस्थान व भैलःद्यःया नाइकें पुजा इलय् हे क्वचायेकाः जात्रा इलय् हे शुरु यानाः द्यः खिउँसे च्वने न्ह्यः हे जात्रा सम्पन्न यायेमाःगु, हुलहुज्जत याइपिंत कडा रुपं कारवाही यायेमागु व कारवाही याःपिंत नं सार्वजनिक यायेमाःगु, भैलःखः सालेगु छन्हु न्ह्यः रथ निर्माण व रथय् रंग पायेगु लगायत सकता ज्या क्वचायेकेमाःगु, रथ सालेगु खिपः बल्लाःगु तयेमाःगु, रथ दयेकीम्ह रकमीयात इलय् भुक्तानी बीमाःगु सुझाव नं बिउगु दु ।

भेलाय् नगरप्रमुख प्रजापतिं ख्वपया बिस्काः जात्रा मर्यादित, शान्तिपूर्ण व अनुशासित रुपय् सम्पन्न याये फत धाःसा उकिं ख्वप नगर व देय्या हे प्रतिष्ठा अप्वइगु विचाः प्वंकादिसें बिस्काः जात्रायात नं सम्पदाया रुपय् विकास यानाः उकिया संरक्षण व संवद्र्धन यायेत नगरपालिका तत्पर दु धयादिल ।

नगरपालिकाया उपप्रमुख रजनी जोशीं बिस्काः जात्रायात शान्तिपूर्ण रुपय् सम्पन्न यायेत नगरपालिकां आवश्यक भूमिका म्हितेगु नापं संस्कृति व जात्राय् दुगु विकृतियात चिइकाः संस्कृतियात न्ह्यःने यंकेमाःगु व जात्राया हरेक गतिविधियात लिपिवद्ध यायेमाःगु आवश्यक जू धयादिल ।

प्रमुख जिल्ला अधिकारी नारायणप्रसाद भट्टं बिस्काः जात्राया व्यवस्थापन तसकं चुनौतिपूर्ण दुगु व अज्याःगु चुनौति समाधान यायेत सम्बन्धित सरोकारवालां थःथःगु थासं भूमिका म्हितेत सकसितं इनाप दिल । ख्वप प्रहरी प्रमुख प्रहरी उपरीक्षक हिमालयकुमार श्रेष्ठं थगुने–नगुने जूगु कमि कमजोरीया समीक्षा यायेमाःगु आवश्यक जूगु खँ कुलादिसें जात्रा संचालन जुइगु लागाय् दुगु निर्माण सामग्री चिइकेत सुचं पिथनेमाःगु खँ धयादिल ।

गुथि संस्थान ख्वपया प्रमुख हरि सुवेदीं विगतय् खने दुगु कमि कमजोरी दोहरे मयायेगु प्रतिवद्धता प्वंकादिसें जात्रा संचालनय् गुथि संस्थानं व्यवस्थापकीय भूमिका म्हितेगु विश्वास प्वंकादिल । ज्याझ्वलय् भैरवनाथ देगः जिर्णोद्वार उपभोक्ता समितिया नायः न्हुछेराम भेले, विद्युत प्राधिकरण ख्वपया प्रमुख प्रज्वलमान श्रेष्ठ, नेपाल टेलिकम ख्वप ज्याकूया प्रमुख वीरेन्द्र श्रेष्ठ, स्थानीय अनन्त धौभडेल, हाकुज्या प्रजापति समाजया नायः रामबहादुर प्रजापति लगायतं जात्रायात व्यवस्थित व शान्तिपूर्ण तरिकां सम्पन्न यायेत थीथी सुझाव बियादीगु खः ।