वन मन्त्री बिल धकाः दिपक मनाङे रुष्ट

येँ (नेपालभाषा टाइम्स) -थःत बी धयातःगु मन्त्रालय मबिसे मेगु मन्त्रालय छ्वःगु कारणं गण्डकी प्रदेशया स्वतन्त्र सांसद दिपक मनाङें मुख्यमन्त्री सुरेन्द्रराज पाण्डे समक्ष थःगु राजीनामा बिउगु दु । थः स्वकीय सचिव मार्फत मनाङें राजीनामा बिउगु खः ।

थ्व स्वयां न्ह्यः मनाङें कःघाना वयाच्वंगु भौतिक मन्त्रालय न्हूगु समीकरण लिपा एमालेया भागय् लाःगु खः । वयां लिपा मनाङेयात वन तथा वातावरण मन्त्रालय बिउगु खः । उकी असन्तुष्टि प्वंकाः म्हिगः मनाङें राजीनामा बिउगु खः । मनाङें म्हिगः जूगु शपथ ग्रहण ज्याझ्वलय् वंगु खःसां नं कार्यभार कायेत मन्त्रालय धाःसा मवंगु खः ।

मनाङें उगु मन्त्रालयय् प्रदेशयात गुगुं नं कथंया अधिकार मदुगु धासें धयादिल, ‘वन प्रदेश सरकारं स्वये दइमखु, वनमन्त्री म्वाः, वन मन्त्रालय अझ नं संघीय सरकारं स्वयाच्वंगु दु । थज्याःगु मन्त्रालय कयां छु याये ?’
लिसें वय्कलं वन मन्त्रालय कांग्रेसया कोटाय् दु धासें धयादिल, ‘जि कांग्रेसया सांसद मखु, स्वतन्त्र सांसद खः, कांग्रेसया कोटाया मन्त्री कांग्रेसया सांसदयात हे बिउ ।’

थ्व स्वयां न्ह्यः मुख्यमन्त्री पाण्डें वंगु इलय् असहज परिस्थितिइ तिबः बिउगु धासें मनाङेयात मन्त्री दयेकेगु नितिं हे मन्त्रालय तछ्यानाः वन तथा वातावरण मन्त्रालयया जिम्मेवारी बिउगु खः ।

मन्त्री मनाङें थः गाडी गयेत व डेरा च्वनेगु नितिं मन्त्री जुयागु मखु धासें धयादिल, ‘जिगु थःगु हे छेँ दु, गाडी दु, जि गाडी गयेगु रहर जुयाः मन्त्री जुयागु मखु । वंगु इलय् मछिंगु परिस्थितिइ सरकारयात साथ बियागु जूगुलिं जितः
वय्कःपिसं मन्त्री दयेकूगु खः । आः जि मन्त्री मजूसां मछिंगु अवस्था मदु ।
बरु जिगु थासय् ल्याय्म्हतय्त बिउसा जिउ ।’

सम्बन्धित बुखँ

LEAVE YOUR COMMENTS