न्यायिक समिति सम्मेलन क्वचाल, ११ गू बुँदाया घोषणापत्र जारी

येँ(नेपालभाषा टाइम्स)- येँ महानगरपालिकाया ग्वसालय् जूगु न्यायिक समिति न्हापांगु राष्ट्रिय सम्मेलन क्वचाल । निन्हुयंकं जूगु सम्मेलन ११ गू बुँदाया न्यायिक समिति येँ घोषणापत्र जारी यासे क्वचाःगु खः ।

चैत १५ व १६ निन्हुयंकं जूगु सम्मेलनया उलेज्या प्रधानमन्त्री पुष्पकमल दाहाल प्रचण्डं यानादीगु खः । सम्मेलनया निन्हुया दिं समापन ज्याझ्वलय् सर्वोच्च अदालतया कायममुकायम प्रधानन्यायाधिश हरिकृष्ण कार्की झायादीगु खः ।

सम्मेलनय् थीथी न्यागू विषयय् ज्यापौ न्ह्यब्वःगु खःसा उकियात समूहगत रुपं सहलह ब्याकूगु खः । वयां लिपा सम्मेलन मूल समारोह समितिया संयोजक लिसें येँ महानगर उपप्रमुख सुनिता डंगोलं ११ गू बुँदाया येँ घोषणा ब्वनाः न्यंकादीगु खः ।

११ गू बुँदाया घोषणापत्रय् नेपाःया संविधान, प्रचलित कानून, न्यायया मान्य सिद्धान्तया लिधंसाय् स्थानीयस्तरय् ब्वलनीगु विवादया सर्वसुलभ, याकनं, निष्पक्ष, प्रभावकारी व जनउत्तरदायी विधिपाखें संबोधन व समाधान यायेगु, विवादयात फत्तले मेलमिलापया माध्यमं समाधान यायेगु व उकिया निंतिं वडास्तरीय् मेलमिलाप केन्द्र सक्रिय रुपं संचालन व क्रियाशील यायेगु, समितिपाखें जूगु मिलापत्र व निर्णय कार्यान्वयनया निंतिं विशेष प्राथमिकता बीगु, दक्ष जनशक्ति, नियमित प्रशिक्षण, पारदर्शीताया निंतिं गां नगरपाखें उपयुक्त कार्यक्रम व बजेटया व्यवस्था यायेगु विषय दुथ्याकातःगु दु ।

थुकथं हे विवाद निरुपण व न्याय सम्पादन यायेबलय् नेपाःया संविधान, प्रचलित कानून, कार्यविधि, न्यायया मान्य सिद्धान्तया परिपालना यायेगु, न्यायिक समितिया आचारसंहिता जारी यानाः परिपालना यायेगु, समितिया क्षेत्राधिकारयात थप स्पष्ट यायेत संघीय सरकार व संघीय संसदयाके माग यायेगु, समितिया पदाधिकारी दथुइ नियमित सम्पर्क, समन्वय, सम्बन्ध, सहकार्य संचार व कार्य सम्पादनय् एकरुपता कायम यायेगु, राष्ट्रिय, प्रदेश व जिल्लास्तरय् मञ्चया संरचना प्रबन्ध यायेगु लगायतया बुदाँत दुथ्याकाः घोषणापत्र जारी याःगु खः ।

सम्बन्धित बुखँ

LEAVE YOUR COMMENTS