आः सार्वजनिक ज्याझ्वलय् प्रम मवनीगु

येँ (नेपालभाषा टाइम्स)- प्रधानमन्त्री पुष्पकमल दाहालं प्रधानमन्त्री कार्यालयया संरचनात्मक हिउपाः हयेगु खँ धयादीगु दु । म्हिगः राष्ट्रया नामय् सम्बोधन यायेगु झ्वलय् प्रधानमन्त्री दाहालं थ्वहे वालंनिसें प्रधानमन्त्री कार्यालयया संरचनात्मक हिउपाः हयेत्यनागु खँ धयादीगु खः ।

प्रधानमन्त्री दाहालं गुकथं संरचनात्मक हिउपाः हयेगु धइगु खँ धाःसा न्ह्यथनादीगु मदु । वय्कलं थम्हं यायेत्यनागु प्रधानमन्त्री कार्यालयया संरचनात्मक हिउपाः मुक्कं राज्यया नितिं छगू संकेत व सन्देश जुइगु खँ नं धयादीगु दु ।

प्रधानमन्त्री दाहालं आः थः निर्धारित पुलांगु ज्याझ्वः बाहेक मेगु सार्वजनिक ज्याझ्वलय् मवनेगु घोषणा नं यानादीगु दु । आः थम्हं न्हूगु नीति व कार्यक्रम, बजेट निर्माण, विकास व सुशासनया पक्षय् कुतः यायेगु खँ नं वय्कलं धयादिल ।

उकथं हे प्रधानमन्त्री दाहालं कार्यक्षमता म्हो जूपिं राजदूत व नियोग प्रमुखयात लित सःतेगु तयारी जुयाच्वंगु जानकारी नं बियादिल । वय्कलं राजदूत व कूटनीतिक नियोगया प्रमुखयात कार्यक्षमताया आधारय् जक पदय् तयेगु खँ स्पष्ट यानादीगु दु ।

सम्बोधनया झ्वलय् प्रधानमन्त्री दाहालं धयादिल, ‘आर्थिक कुटनीतिक नियोगयात लगानी व पर्यटनय् परिणाममुखी परिचालनया नितिं आह्वान यानाच्वना । कार्यक्षमता कमजोर जूपिं राजदूत व नियोग प्रमुखयात लित सःतेगु तयारी यानाच्वनागु दु ।’ प्रधानमन्त्री दाहालं देशय् लगानी हयेत भूमिका म्हितेमाःगु व पर्यटन वृद्धिया नितिं कुटनीतिक गतिविधि जुइमाःगु खँ नं धयादीगु दु ।

सम्बन्धित बुखँ

LEAVE YOUR COMMENTS