ख्वपय् पुलुकिसि जात्रा यानाः यँयाः क्वचाल
ख्वप (नेपालभाषा टाइम्स)÷येँ देया दकलय् ताःहाकःगु ऐतिहासिक, धार्मिक, सांस्कृतिक महत्वया अतिकं तःजिगु यँयाः वंगु शनिवाः विधिवत रुपं क्वचाःगु दु । यंलाथ्व द्वादशिकुन्हु हनुमानध्वाखा लाय्कुलिइ यःसिं थंगुया लिसें न्ह्याःगु यँयाः यंलागा चौथिकुन्हु बहनि यःसिं क्वःथयेवं छवाःयंकंया यँयाः विधिवत रुपं क्वचाःगु खः ।
येँय् शनिवाः यँयाः क्वचाःसां ख्वपय् धाःसा आइतवाः जक विधिवत रुपं यँयाः क्वचाःगु दु । वंगु आइतवाः ख्वपय् पुलुकिसि जात्रा न्यायेकाः यँयाः क्वचायेकूगु खः । वकुन्हु सनिलय् ख्वपया लाकुलाछेँ त्वालं पुलुकिसि जात्रा पिथंगु खः । यँयाः जात्राया झ्वलय् यमाःद्यः (इन्द्र)या बाहांकथं कयातःम्ह पुलुकिसियात नगर परिक्रमा याकूगु खः । पथं दयेकातःगु किसि आकृतियात तुयुगु कापतं भुनातःगु पुलुकिसि दुने मनू च्वनाः जात्रा यासें नगर परिक्रमा याकूगु खः । पुलुकिसि जात्रायात नगर न्यंकं तसकं उत्साहपूर्वक हंगु खः ।
नगर परिक्रमा याकेगु झ्वलय् पुलुकिसियात थाय्थासय् ओहरदोहर यानाः प्याखं क्यंगु खःसा जात्रा स्वयेगु निंतिं आपालं मनूतय् उपस्थिति दुगु खः । ख्वपया दुने दुनेया लागा गल्ली गल्ली, चुक, चकंगु थासय् पुलुकिसिया जात्रा याःगु खः । पुलुकिसि जात्रा स्वयेगु निंतिं विशेष यानाः ख्वप लाय्कू लागा, तःमधि, दत्तात्रय आदि थासय् आपालं स्वकूपिनिगु उपस्थिति दुगु खः ।
लाकुलाछेँ त्वालं शुरु जूगु पुलुकिसि जात्रा पोटरी स्क्वायर, नासमना, इताछँे, ख्वप लाय्कू, बालाखू, चोछेँ, भोलाछेँ, थालाछेँ, सुर्जमधि जुयाः अनं इनाचो, ग्वःमधि, तःमधि जुयाः लाकुलाछेँ त्वालय् थ्यंकाः क्वचायेकूगु खः । थुकथं नगर परिक्रमा याकीगु इलय् तलातुंछिइ थ्यंकाः पुलुकिसियात लः त्वंकेगु चलन दुसा जात्राया निंतिं आवश्यक तयारी दक्वं स्थानीयतय्सं हे यायेगु याना वयाच्वंगु दु ।
LEAVE YOUR COMMENTS