न्हापांगु नवीन कलाश्री पुरस्कार वरिष्ठ कलाकार मानन्धरयात

येँ – नेपाःया कला क्षेत्रया नांजाःम्ह चित्रकार किरण मानन्धरयात नवीन कलाश्री पुरस्कार लःल्हाःगु जूगु दु । कलाकार क्षेत्रलाल कायस्थ प्रतिष्ठान पोखरां न्हापांखुसी वरिष्ठ कलाकार मानन्धरयात न्यय्द्वः तका राशि व ताम्रपत्रसहितया उगु पुरस्कार लःल्हाःगु खः । पुरस्कारया निंतिं गोपाल श्रेष्ठया संयोजकत्वय् दुगु छनौट समितिं वरिष्ठ चित्रकार मानन्धरयात पुरस्कार बीगु निर्णय याःगु खः ।

वंगु मंसिर १ गतेकुन्हु थनया नेपाल आर्ट काउन्सिल बबरमहलय् जूगु कला प्रदर्शनया झ्वलय् लाकाः उगु पुरस्कार प्रदान याःगु खः । वरिष्ठ कलाकार क्षेत्रलाल कायस्थं सिर्जना यानादीगु समुद्रीसतहनिसें कयाः हिमालपारी तकया लः रंग व एक्रेलिकरंगया भूदृश्य व अमूर्त चित्र यानाः ७६ चित्र ब्वज्याय् तयातःगु दु ।

प्रतिष्ठानया उपाध्यक्ष नीरज कायस्थं प्रत्येक निदँय् छक्वः बीगु ल्याखं पुरस्कारया स्थापना यानागु जानकारी बियादिसें कला क्षेत्रय् विशिष्ट योगदान बियादीम्ह व्यक्तित्वयात उगु पुरस्कार बीगु नं वय्कलं जानकारी बियादिल ।