कमेडियन सिंह, कमेडी क्याफे संचालकयात कारवाही न्ह्याकेगु निंतिं जाहेरी बिल

येँ (नेपालभाषा टाइम्स)- नेवाः समुदाययात अपमान यानाः कमेडी क्यंम्ह कमेडियन अपूर्व क्षितिज सिंह लिसें उगु स्टायण्ड अप कमेडी ज्याझ्वःया कमेडी क्याफेया संचालक विरुद्ध साम्प्रदायिक भावना खलल याःगु द्वपनय् नेवाः अभियन्तातय्सं जोहरी बिउगु दु ।

आइतवाः सुथय् निसें महानगरीय प्रहरी परिसर टेकुइ मुनाच्वंपिं अभियन्तातय्सं सिंह, कमेडी क्याफे संचालक व उगु ज्याझ्वलय् सहभागी जुयाः साम्प्रदायिक भावना खलल यायेगु ज्याय् मतियार जूपिं विरुद्ध कानुनी कारवाही यायेत जाहेरी बिउगु खः । जोहरीइ ८५ म्हं मल्याक अभियन्तातय्सं सही याःगु दु ।

नेवाः समुदायया अपमान जुइकथं स्टायण्ड अप कमेडी क्यंम्ह सिंहयात प्रहरीं ज्वनेधुंकूगु दु । कमेडी क्याफेय् सिंहया प्रस्तुति पिहां वयेवं शनिवाः हे नेवाः अभियान्ततय्सं येँ महानगरीय प्रहरी परिसर टेकुइ वनाः वयात ज्वनेत निवेदन बिउगु खः ।

प्रहरीइ निवेदन बिइवं सिंहं सामाजिक सञ्जालपाखें माफी फ्वंगु खः । तर माफी फ्वंसां नेवाः समुदाययात बांमलाक अपमान याःगुलिं माफी बिइगु मखु, कारवाही न्ह्याकेमाःगु सः सामाजिक सञ्जालय् थ्वयाच्वंगु खः । थ्व हे सः कथं वया विरुद्ध कानुनी कारवाही हे न्ह्याकेगु निंतिं जोहरी हे बिउगु खः ।