
येँ – वल्र्ड नेवाः अर्गनाइजेसन (डब्ल्युएनओ) नेदरल्याण्ड कचाया ग्वसालय् दँय्दसं थें थुगुसी नं नेपाल संवत् ११४० न्हूदँ हनेगुलिसें मंकाः म्हपुजा ज्याझ्वः जुल । वंगु नेपाल संवत् ११४० कछलाथ्व पारुकुन्हु उगु ज्याझ्वः नेदरल्याण्डया आमस्टरदमस्थित मिलिंगनहोफय् जूगु खः ।
नेदरल्याण्डया थीथी थासं वंपिं नेवाःनापं स्थानीय विदेशीतय्त मंकाः म्हपुजा याःगु ज्याझ्वलय श्रीलक्ष्मी श्रेष्ठ व नितु श्रेष्ठं मंकाः म्हपुजा याकादीगु खः । म्हपुजाय् विनोद श्रेष्ठ, सुरेश श्रेष्ठ, मधु श्रेष्ठ, आशिष राजभण्डारी, विरेन श्रेष्ठ, सुभद्रा श्रेष्ठ, आशिका श्रेष्ठ, सुजिब श्रेष्ठ, नुगः श्रेष्ठ, श्रृष्टि श्रेष्ठपिंसं माःकथंया ग्वाहालि यानादीगु खः ।
न्हूदँया लसताय् सकलें मुनाः थवंथवय् न्हूदँया भिंतुना कालबिल यायेधुंकाः मंकाःकथं म्हपुजा याःगु खःसा म्हपुजाय् सहभागि सकसितं नेवाः भ्वय् नकेगु ज्या जूगु खः । डब्ल्युएनओया संस्थापक नायःलिसें सल्लाहकार डा. बालगोपाल श्रेष्ठं म्हपुजा व नेपाल संवत्या महत्वयात कयाः न्वचु बियादीगु खः ।
उगु हे ज्याझ्वलय् विरेन श्रेष्ठया अध्यक्षताय् डब्ल्युएनओ नेदरल्याण्ड कचा सामाजिक संस्थाकथं दर्ता यायेत नालेमाःगु प्रक्रिया नापं आः विधान दयेकाः डच कानुनकथं संस्थायात न्ह्याकेमाःगु विषयय् छ्याञ्जे नुगः श्रेष्ठं जानकारी बियादीगु खः ।
LEAVE YOUR COMMENTS