‘आः विमान न्यायेत फुक्क हे ग्याइगु जुल’

येँ (नेपालभाषा टाइम्स)- नेपाल वायुसेवा निगमं निगः वाइडबडी विमान न्यायेगु ज्याय् भ्रष्टाचार याःगु धकाः विशेष अदालतं निगमया तत्कालीन महाप्रवन्धक सुगतरत्न कंसाकार लगायत प्यम्हेसित जरिवाना व जेल सजाय समेत बीगु धकाः याःगु फैसला लिपा आः निगम दुने विमान न्यायेगु ज्याय् सुं नं न्ह्यचिलेत ग्याइगु खँ धाःगु दु ।

तत्कालीन महाप्रबन्धक कंसाकारं ‘नेपालभाषा टाइम्स’ लिसे बःचाहाकलं खँ ल्हासें धयादिल, ‘आः निगमय् विमान न्यायेगु धाल कि हे सकलें ग्याइगु जुल । तर विमान न्यानाः बिजनेसया भोलुम बढे मयायेगु खःसा निगमं गबलें नं फाइदा याये फइ मखु ।’

अथे हे वय्कलं छगू टेलिभिजनयात अन्तर्वार्ता बिसें धयादिल, ‘नेपाःया त्रिभुवन अन्तर्राष्ट्रिय विमानस्थलय् वार्षिक १ खर्ब ६० अर्बया व्यापार याइ । उकी नेपालं याइगु व्यापार धइगु मुक्कं ७–८ अर्बया जक खः । विमान थपे मयायेकं नेपाःया व्यापार बढे जुइ मखु । आः विमान न्याइपिंत हे जेलय् कुना बीगु खःसा विमान सुनां न्याइ ?’

नेपाल वायुसेवा निगमयात धराशायी यानाः थनया व्यापार फुक्क विदेशी कम्पनीतय्त हे लःल्हायेत उद्यत जुयाच्वंपिं हवाइ माफियातय्सं थ्व ज्या याःगु द्वपं नं वय्कलं बियादीगु दु । नेपाल सरकारया खरिद ऐन दुने च्वनाः टेण्डर आह्वान यानागु व उकी मध्ये दकलय् कम ध्यबां जहाज बी धाःपिंपाखें हे जहाज न्याना कयागु सीक सीकं उकी समेत भ्रष्टाचार जुल धकाः द्वपं बिउगु खँय् वय्कलं आश्चर्य नं प्वंकादीगु दु ।

लुमंकेबहः जू, थ्व स्वयां न्ह्यः वय्कलं जहाज न्यायेत बैना बिउबलय् बैना बिउगु गलत जुल धकाः द्वपं बिउगु खः । उबले वय्कःयात बी हे मजिउगु बैना बिल धकाः ज्वनाः कुना बिउगु खः । तर लिपा विमान कम्पनीं उगु बैना हे लित बिल । आः बैनाया प्रक्रिया पूरा यानाः विमान न्याःबलय् उकी भ्रष्टाचार जुल धकाः हानं कुनेगु फैसला जूगु दु । थुकिं वास्तवय् निगमयात छुं हे हालतय् विमान खरिद याके मबीगु लागिं तःधंगु शक्ति लगे जुयाच्वंगु प्रस्ट सीदुगु खँ नं जानकारतय्सं धाःगु दु ।