ने. सं. ११४३ चौलाथ्व सप्तमी -

बाबुरामं गोयल नापलाःगु हे खः ला ?, भारतीय सञ्चार माध्यमं फय्गं खँ च्वःगु हिसिलाया दावी

येँ (नेपालभाषा टाइम्स) – छुं ई न्ह्यः तिनि प्रधानमन्त्री केपी शर्मा ओलीयात नापलानाः लिहां वंम्ह भारतीय गुप्तचर संस्था ‘रअ’ या प्रमुख सामन्तकुमार गोयलं पुलांम्ह प्रधानमन्त्री डा. बाबुराम भट्टराईयात नं नापलाःगु दु धकाः छगू भारतीय सञ्चार माध्यमं च्वयाहःगु च्वसुया कारणं नेपालय् चर्चा व विवाद पिहां वःगु दु ।

भारतीय सञ्चार माध्यमय् पिहां वःगु उगु च्वसुयात थनया थीथी मनूतय्सं रिट्विट यानाः प्रचार यायेवं डा. भट्टराई नं विवादय् लाःगु खः । नांजाःम्ह च्वमि खगेन्द्र संग्रौलां अज्याःगु रिट्विटया आधारय् थःगु धापू तसें डा. भट्टराईनं गोयलया म्हय् कोरोना संक्रमण याःथें गोयलं डा. बाबुरामया न्ह्यपुइ कोरोना संक्रमित याना थकल लाकि छु धकाः व्यंग्य यानादीगु दु। उकियात कयाः डा. भट्टराईनं मेगु ट्विट यासें संग्रौला थेंज्याःम्ह च्वमि समेत क्वखं न्हाय्पं यंकल धायेवं क्वःया लिउ लिउ ब्वाँय् जुल धकाः च्वयादीगु दु। डा. बाबुराम भट्टराई धाःसा थौंकन्हय् कोरोना संक्रमण जुयाः छेँय् हे आइसोलेशनय् च्वनादीगु दु ।

थ्व विवाद बारे वय्कःया जहान लिसें मिसा नेतृ हिसिला यमियात स्वापू तयाः न्यनाबलय् वय्कलं थ्व फुक्क फय्गं खँ धकाः टिप्पणी यानादिल म्हिगः नेपालभाषा टाइम्स लिसे खँ ल्हासें वय्कलं भारतीय मिडियातय्त नेपाःया हे छुं मनूतय्सं ग्वाकाः अथे च्वकाच्वंगु खयेमाः धकाः नं द्वपं बियादिल ।

डा. भट्टराईया प्रेस सल्लाहकार विश्वदीप पाण्डें अज्याःगु खँ च्वःम्ह भारतीय पत्रकार ज्योति मल्होत्रायात हे स्वापू तयाः उकिया आधिकारिता पुष्टि यायेत कुतः याःगु व उकी पत्रकार मल्होत्रां थःगु गल्ती स्वीकार यानादीगु खँ नं मय्जु यमिं कनादिल । उकियात कयाः खण्डन पिहां वइगु जानकारी बिसें वय्कलं धयादिल, ‘बाबुराम मफयाः आइसोलेशनय् लानाच्वंगु इलय् थज्याःगु खँ छाय् पिहां वल धइगु नं थुइकेमाः ।’

डा. भट्टराई नापं मय्जु यमि नं थौंकन्हय् कोरोना पोजिटिभ जुयाः आइसोलेशनय् च्वनादीगु दु। थःगु होम आइसोलेशन रोचक जुयाच्वंगु खँ कँसें वय्कलं धयादिल, ‘जनयुद्ध लिपा जिपिं कलाः भाःत नापं च्वनागु थ्वहे न्हापांखुसी खः । मखुसा ला जिपिं नाप धइगु हे लाइगु मखु। कोरोनां नापलाका बिल ।’

भारतीय पत्रकार ज्योति मल्होत्रां नं थःगु च्वसुइ रअ’ या प्रमुख गोयलयात नं बाबुरामपाखें कोरोना संक्रमित जूगुलिं वय्कः नं आः क्वारेन्टाइनय्च्व नाच्वन जुइमाः धकाः च्वया हःगु खः ।