आः महानगरया सतकय् हाइमास मत
येँ – येँ महानगरपालिकां महानगर लागाया मुख्य मुख्य थासय् हाइमास मत जडान याइगु जूगु दु । येँ मनपां महानगरया मुख्य मुख्य चोकय् प्यखेरं जः बीगु कथंया मत ‘हाइमास’ जडान यायेगु योजना न्ह्यःने हःगु खः । येँ मनपां आः तत्कालया निंतिं महानगर दुने दकलय् अप्वः सवारी चाप अप्वइगु थासय् उकथंया मत जडान यायेत्यंगु खः ।
येँ मनपां नीगू थासय् मत जडान यायेत्यंगु खः । थौंकन्हय् महानगरया मुख्य लगायत मेमेगु सहायक सतकय् तयातःगु मतया तुलनाय् ‘हाइमासं’ तःधंगु क्षेत्रय् जः बी फइगु जूगुलिं मनपां उकथंया मत जडानया योजना न्ह्यःने हःगु खः । येँ मनपाया प्रवक्ता ईश्वरमान डंगोलं हाइमास मत जडान यायेधुंकाः उकिं मत जडान जूगु थासं प्यखेरं जः न्यना वनीगु जानकारी बियादिल ।
वय्कलं धयादिल, ‘गुगुं नं चुकय् हाइमास मत जडान यायेवं उकिं प्यखेरं जः न्यना वनी ।’तसकं तातापाक तकं जः बी फइगु जूगुलिं उकथंया मत जडान यायेगु योजना मनपां न्ह्यःने हःगु जानकारी बियादिसें प्रवक्ता डंगोलं मत जडान यायेत विस्तृत परियोजना प्रतिवेदन (डीपीआर) निर्माण यायेगु ज्यातकं लिपांगु चरणय् थ्यने धुंकूगु धयादिल ।
हाइमास मत जडानया निंतिं महानगरं बजेटया व्यवस्था याइगु जानकारी बियादिसें वय्कलं आः तत्कालया निंतिं बानेश्वर, कोटेश्वर, चाबही, त्रिपुरेश्वर, महाराजगंज, माइतीघर लगायत सवारीया अप्वः मात्राय् चाप दइगु मुख्य मुख्य थासय् हाइमास मत जडान यायेगु जुइ धयादिल ।
नेपाःया निंतिं हाइमास न्हूगु कथंया प्रविधि जूगु व उकिया अध्ययन यायेत हे यक्वः ई काःगु प्रवक्ता डंगोलया धापू दु ।
महानगरपालिकां ‘मेयर उज्यालो कार्यक्रम’ अन्तर्गत मुख्य व दुनेया सतकय् यानाः झिंखुद्वलं मल्याक मत जडान यायेधुंकूगु दु । मनपां वडा ज्याकूनाप समन्वय यानाः उकथं मत जडान याःगु खः ।
LEAVE YOUR COMMENTS