शाक्य फाउण्डेसनया झिंच्याक्वःगु दँमुँज्या

येँ – दी शाक्य फाउण्डेसन नेपालया झिंच्याक्वःगु दँमुँज्या व नेपाल संवत् ११४० न्हूदँया लसताय् भिंतुना कालबिल ज्याझ्वः वंगु शनिवाः जुल । उगु दँमुँज्याय् एसइइ परीक्षाय् उत्कृष्ट ल्याः हःपिं शाक्य कुल पुत्र व कुल पुत्रीपिंत नं हनेज्या याःगु खः ।

फाउण्डेसनया नायः अमीरमान शाक्यया सभापतित्वय् जूगुु ज्याझ्वलय् मूपाहां येँ महानगरपालिकाया प्रमुख विद्यासुन्दर शाक्यं नेपाल संवत्या प्रवर्तक राष्ट्रिय विभूति शंखधर साख्वाःया किपाय् स्वांमाः क्वखायेकादीगु खः । शिल प्रार्थना यासे न्ह्याःगु ज्याझ्वलय् मूपाहां, पाहां, संस्थाया वरिष्ठ सल्लाहकार, सल्लाहकारपाखें बोधिमत च्याकाः उलेज्या यानादीगु खः ।

ज्यासना पुचःया दुजः गंगा शाक्यं लसकुस यानादीगु दँमुँज्याय् मूछ्याञ्जे माधुरी शाक्यं वार्षिक व दांभरिं माणिकरत्न शाक्यं आर्थिक विवरण न्ह्यब्वयादीगु खः । ज्याझ्वलय् विशेष पाहांकथं झायादीम्ह प्रदेश नं. ३ या सांसद राजेश शाक्य, प्रमुख सल्लाहकार देवकाजी शाक्य, सल्लाहकार डा. वज्रराज शाक्य, कानूनी सल्लाहकार ज्ञानरत्न शाक्य लगायतं भिंतुना बियादिसें थःथःगु नुगःखँ तयादीगु खः ।

ज्याझ्वलय् संस्थाया अध्यक्ष शाक्यं एसइइ परीक्षाय् दकलय् अप्वः ल्याः हयादीपिं कृतिम शाक्य व कृपा शाक्ययात ‘जुजुभाई नानीछोरी शिक्षा पुरस्कार’ लःल्हानादीगु खः । उगु हे ज्याझ्वलय् खानेपानी संस्थानया प्रमुख कार्यकारी अधिकृत जुयादीम्ह संस्थाया आजीवन दुजः मिलनकुमार शाक्य, निवर्तमान अध्यक्ष जनक नेवाःयात नं संस्थाया लोगो व हनापौ लःल्हासे सम्मान याःगु खः ।