
प्रधानमन्त्री वल धाःसा हाकुगु ध्वाँय् क्यनेगु ख्याच्वः
येँ – चोभारय् सुख्खा बन्दरगाह तयेगु निंतिं प्रधानमन्त्री केपी ओली म्हिगः शिलान्यास याइ धयातःगु ज्याझ्वः स्थानीय जनताया विरोधं यानाः स्थगित जूगु दु । स्थानीय जनतां यदि शिलान्यासया ज्या यात धाःसा प्रधानमन्त्रीयात हे हाकुगु ध्वाँय् क्यनाः विरोध यायेगु जुइ धकाः ख्याच्वः बिउगुलिं थौंया ज्याझ्वः स्थगित याःगु खः ।
स्थानीय जनताया विरोध व स्थानीय जनप्रतिनिधिं नं स्थानीय जनतायात साथ बीवं शिलान्यास ज्याझ्वः अन्तिम इलय् वयाः स्थगित यायेमाःगु खँ धाःगु दु । चोभार संरक्षण समितिं थन सुख्खा बन्दरगाह दयेकल धाःसा उगु क्षेत्रया वातावरणया लिसें ऐतिहासिक व सांस्कृतिक सम्पदायात लिच्वः लाइ धासें सुख्खा बन्दरगाह निर्माण ज्याया विरोध याना वयाच्वंगु खः ।
संरक्षण समितिं सुख्खा बन्दरगाह–यात कयाः थ्वहे वइगु भदौ ९ गते शनिवाः छगू अन्तक्र्रिया ज्याझ्वः नं यायेत्यंगु दु । उगु ज्याझ्वलय् सरकारी प्रतिनिधि व स्थानीय जनप्रतिनिधि नं दुथ्याइगु जानकारी संरक्षण समितिया संयोजक पञ्चलाल महर्जनं बियादिल ।
संरक्षण समितिं छुं नं लागाया विकास यायेगु झ्वलय् म्हो जक विनास यायेमाः धया वयाच्वंगु दु । न्हापा उगु थासय् हिमाल सिमेन्ट कारखाना तयातःगु इलय् स्थानीय जनतां आपालं समस्या फयेमाःगु धासें आः सुख्खा बन्दरगाह दयेकल धाःसा हाकनं अज्याःगु हे समस्या फयेमालीगुलिं थन बन्दरगाह दयेके मबीगु खँ समितिं धया वयाच्वंगु दु ।
न्हापा थःपिनि पुर्खां धिमे बाजं थानाः लसकुस याःगु हिमाल सिमेन्टं लिपा वनाः चोभाःया जनजीवन व पर्यावरणय् बांमलाक लिच्वः लाकूगु जक मखुसें चोभाःया विकासय् तकं लिच्वः लाकूगु कारणं आः सुख्खा बन्दरगाह दयेकल धाःसा थुकिं नं हिमाल सिमेन्टं लाकूगु थेंज्याःगु हे बांमलाःगु लिच्वः लाकीगुु धापू समितिया दु ।
स्थानीय जनतां न्हापा हिमाल सिमेन्ट कारखानाया निंतिं अधिग्रहण यानातःगु जग्गा आः उगु प्रयोजन हे सिधयेधुंकूगुलिं उगु जग्गा स्थानीय जनतायात हे लित बीमाःगु माग नं यानाच्वंगु दु ।
LEAVE YOUR COMMENTS