उत्तर कोरियाली लगानी पूवंक हे लिहां वन
येँ – संयुक्त राष्ट्र संघया इनाप कथं नेपाःया थीथी थासय् चायेकातःगु उत्तर कोरियाया फुक्कं उद्योग व्यवसाय बन्द जूगु दु । राष्ट्र संघपाखें नेपाः सरकारयात इनाप यानाहः कथं सरकारं उत्तर कोरियाया लगानीइ चायेकातःगु फुक्क कम्पनी बन्द यायेत निर्देशन बिउगु खः ।
तःक्वःतक इनाप यानां नं उत्तर कोरियाली लगानीकर्तातय्सं थःपिनि कम्पनी बन्द मयाःगु कारणं नेपालं अन्तिम अल्टिमेटम हे बिउगु खःसा उगु अल्टिमेटम क्वचाये न्ह्यः हे लगानीकर्तातय्सं फुक्कं कम्पनी बन्द याःगु खः । थ्व कम्पनीनतय्त नेपाः सरकारं कार्तिक १४ तकया दुने बन्द मयात धाःसा सरकार थम्हं हे बन्द याकः वये माली धकाः ख्याच्वः बिउगु खः ।
सरकारया निर्देशन कथं येँय् उत्तर कोरियाली लगानीइ चायेकातःगु बोटोङगाङ रेष्टुरेन्ट एण्ड बार व मिनाज रेष्टुरेन्ट एण्ड बार बन्द यायेगु सहमति जुइधुंकूगु दु । लगानी लित यंकेत सरकारं बिउगु पौ उत्तर कोरियाली कम्पनीतय्सं बुझे यायेधुंकूगु दु । उमिसं आः थ्व पसः मेपिंत मीगु वा बन्द हे याना थकेगु विकल्प मालाच्वंगु खँ धाःगु दु ।
उत्तर कोरियां नेपालय् लगानी यानातःगु मेगु संस्था दमौलीया ‘नेकोर्यो अस्पताल’ खः । थ्व अस्पतालय् स्थानीयया ६५ प्रतिशत शेयर दुसा बाँकी शेयर उत्तर कोरियालीतय्गु खः । सरकारया उजं वयेवं उत्तर कोरियाली लगानीकर्तातय्सं थःपिनि शेयर मीगु निर्णय याःगु दु ।
थ्व लगानीकर्तातय्त सरकारं थःपिनि लगानी लित कायेधुन धकाः सम्बन्धित विभागं च्वयातःगु पौ तकं बुझे याये हजि धकाः निर्देशन बिउगु खः ।नेपालय् उत्तर कोरियाया लगानीइ ९ गू कम्पनी सञ्चालन जुयाच्वंगु दु । थगुने नेपालं सःतूगु लगानी सम्मेलनय् नं उत्तर कोरियां मुक्कं यानाः २३ करोड तका बराबरया लगानी यायेगु प्रतिवद्धता प्वंकूगु खः । आः उगु लगानी नेपालं दुमकाइगु जूगु दु ।
उत्तर कोरिया विरुद्ध अझ कडा नाकाबन्दी तयेगु संयुक्त राष्ट्र संघ सुरक्षा परिषद्या निर्णय कथं विश्वया फुक्कं देशय् चायेकातःगु उत्तर कोरियाली लगानी लित छ्वयेगु ज्या जुयाच्वंगु खः । सुरक्षा परिषदया प्रस्ताव नम्बर २३९७ या उगु निर्णय कथं नेपालय् नं उत्तर कोरियाली लगानी लित यंकेत नेपाः सरकारं पहल याःगु खः । आः उत्तर कोरियाली लगानी पूवंक हे पिहां वंगु खँ धाःगु दु ।
LEAVE YOUR COMMENTS