सरकारं यात फोहोरया राजनीति

येँ -स्थानीय निर्वाचन न्ह्यःने वयाच्वंगु इलय् सरकारं राजधानी येँ देशय् हानं फोहोर द्वँचिंकाः दुर्गन्ध न्यंका बिउगु दु । थौंकन्हय् येँया कालिमाटी, वाफल, लुँहिति आदि लागाय् फोहोर द्वँचिंकाः वानातःगु खनेदु ।

म्हीग वा वयाः अन वांछ्वयातःगु फोहोरपाखें तसकं दुर्गन्ध समेत वःगु खँ स्थानीयवासीतय्सं धाःगु दु । थथे हे वा वयाच्वन धाःसा फोहोर फुक्क उखेंथुखें वाः वनाः दुर्गन्ध झन् अप्वयेफुगु खँ धाःगु दु । अथे हे निभाः त्वल धाःसा थुकिया हे कारणं ल्वय् समेत ब्वलनेफुगु खँ नं धाःगु दु ।

थौंकन्हय् स्वनिगःया फुक्कं लागाया वडा अध्यक्ष लगायतया जनप्रतिनिधित चुनाव प्रचारय् वनाच्वंगु दु । चुनावय् दनीपिं जनप्रतिनिधिं अनिवार्य राजीनामा बीमाःगु निर्वाचन आयोगया प्रावधानं यानाः सकलें जनप्रतिनिधित राजीनामा बियाः प्रचारय् वनाच्वंगु कारणं वडाया ज्या समेत अलपत्र जुयाच्वंगु खँ नं धाःगु दु ।

सरकारं धाःसा फोहोर वायेगु डम्पिङ साइट वनेगु लँ अवरुद्ध जुयाच्वंगु कारणं फोहोर वाये मफयाच्वन धइगु त्वहः चिनाच्वंगु खनेदु । येँय् विपक्षी पार्टी एमालेया नेतृत्वयात थुकिया दोष बियाः गठबन्धन सरकारं फोहोरया राजनीति याना हःगु खँ स्थानीय मनूतय्सं धाःगु दु ।

सम्बन्धित बुखँ

LEAVE YOUR COMMENTS