येँमपा २३ वडाय् मेलमिलाप केन्द्र स्थापना

येँ(नेपालभाषा टाइम्स)- येँ महानगरपालिका २३ वडाय् मेलमिलाप केन्द्र स्थापना याःगु दु । येँ महानगरपालिकाया उपप्रमुख सुनिता डंगोलं २३ वडाय् स्थापना याःगु केन्द्रया उलेज्या यानादीगु खः ।

महानगरपालिकाया दक्वं धइथें वडाय् मेलमिलाप केन्द्रया अभ्यास जुयाच्वंगु धासें उपप्रमुख डंगोलं थाय्या अभावया कारणं गुलिखे वडाय् विचाः याःथें व्यवस्थित जुइ फयाच्वंगु मदु धयादिल ।

मेलमिलाप केन्द्र स्थापना थःपिनिगु प्राथमिकताया विषय जूगु खँ कनादिसें उपप्रमुख डंगोलं धयादिल, ‘विवादया पक्षया खँत पुचलय् धायेत थाकुइ, गुलिखे अवस्थाय् अन्तरंग खँ नं दयाच्वनी । अज्याःगु खँ ल्हायेबलय् व्यक्तिया गोपनीयताया हकयात नं ध्यानय् तयेमाःगु जुइ । नितान्त खँ पुचलय् वइबलय् उकिं लाकीगु प्रभावयात नं ध्यान बीमाः ।’

थःपिंसं ज्यंकागु विवादया अभिलेखीकरणयात नं व्यवस्थित यायेमाःगु खँय् बः बियादिसें वय्कलं थःपिंसं यानागु कुतः व उकिया लिच्वः अंकय् जक क्यने फइगु व अज्याःगु अभिलेख नितान्त ज्याकूया प्रयोजनया निंतिं जक जुइगु नं वय्कःया धापू दु ।

विधायन समितिया संयोजक तकं जुयादीम्ह २३ वडाअध्यक्ष मचाराजा महर्जनं वडाय् वःगुमध्ये ८० प्रतिशत स्वयां अप्वः विवाद कार्यकक्षय् हे समाधान जुयाच्वंगु अनुभव न्यंकादिल । वडाअध्यक्ष महर्जनं थःगु वडापाखें न्यायिक समितिइ यक्व विवाद मवंगु दावी यासें दक्वं वडामध्ये थःगु वडापाखें गुगुं नं विवाद वा मुद्दा केन्द्रय् मवनेमा धइगु हे थःपिनिगु चाहना खः धयादिल ।

आपसी असमझदारीयात विवादया रुपय् मखसे सहलहया रुपय् थवंथवय् खँ ब्याकाः न्यनेगु व उकथं खँ ल्हाल्हां विवादयात निष्कर्षय् थ्यंकेगु यानाच्वनागु वय्कलं धयादिल । थ्व स्वयां न्ह्यः वडा ज्याकुथिं कार्यालय संचालन जुयाच्वंगु थासय् मेलमिलाप याकेगु याना वयाच्वंगु खःसा महिला संजाल व केन्द्रया निंतिं बिस्कं कक्षया आवश्यक जुइगं ओमबहालय् क्वथा बालं कयाः कक्ष स्थापना याःगु खः ।

केन्द्रया उलेज्या लिपा उपप्रमुख डंगोलं महिला संजाल व मेलमिलाप केन्द्रया कक्षया निरीक्षण यानादीगु खः ।

सम्बन्धित बुखँ

LEAVE YOUR COMMENTS