‘नेपाःयात ‘सी’ मखु ‘जी’ बिचाः माः’

येँ – नेपाः सरकारं लिपांगु इलय् चीन लिसे क्वातुका यंकूगु स्वापूयात कयाः भारतीय जनता पार्टीं असन्तुष्टि प्वंकूगु दु । भाजपाया प्रवक्ता विजयशंकर शास्त्रीं नेपालय् लिपांगु इलय् अप्वया वंगु चिनियाँ प्रभावयात लक्षित यासें नेपाःया निंतिं ‘सी’ विचारधारा मखु, ‘जी’ (गान्धी) विचारधारा आवश्यक जूगु खँ धयादीगु दु ।

येँया द्वारिका होटलय् म्हिगः पत्रकारतलिसे खँ ल्हासें वय्कलं नेपालय् ‘सी’ विचारधारा म्वाःगु खँ धयादीगु खः । वंगु छुं ई न्ह्यः जक नेपाल कम्युनिष्ट पार्टी (नेकपा) व चिनियाँ कम्युनिष्ट पार्टी दथुइ ‘सी’ विचारधारा बारे येँय् निन्हुयंकंया प्रशिक्षण ज्याझ्वः जूगु खः । उकी असन्तुष्टि प्वंकुसें भाजपा प्रवक्ता शास्त्रीं नेपाःया कल्याण गान्धी विचारधारां जक जुइगु खँ धयादीगु खः ।

वय्कलं चाःहिकाः नेपाः चीनपाखे मखुसें भारतपाखे धेचुइमाःगु आशय प्वंकुसें कम्युनिष्ट विचारधारा धइगु जनता विरोधी विचारधारा जूगु द्वपं नं बियादिल । शास्त्रीं सुं नं नेपाःमि भारतया विरोधी जुइ फइ मखु धासें नेपालय् छगू समुदाययात ल्ह्वनाः भारत विरोधी दयकेगु कुतः जुयाच्वंगु द्वपं नं वय्कलं बियादिल ।

वय्कलं धयादी, ‘भारत न्ह्याबलें नं नेपाःया विकास चाहे जू, नेपाःया विकास हे भारतया विकास खः । वय्कलं स्पष्ट रुपं भासं हे नेपाः धर्म निरपेक्ष राष्ट्र मजुसे हिन्दू राष्ट्र जुइमाः धासें संविधानय् धर्म निरपेक्ष च्वयेवं छुं मजुइगु दावी नं यानादिल ।

सम्बन्धित बुखँ

LEAVE YOUR COMMENTS