न्यत तुलाधर समिति न्हूगु ज्यासना पुचः

येँ – न्यत तुलाधर समितिया झिक्वःगु दँमुँज्या व न्याक्वःगु तःमुँज्या नकसतसन क्वचाल । उगु तःमुँज्यां समितिया न्हूगु ज्यासना पुचः नं ल्यःगु खः ।समितिया नायः सुधारमान तुलाधरया सभापतित्वय जूगु ज्याझ्वः त्यंघः त्वाः कवःया थाकुलि जितरत्न तुलाधरं उलेज्या यानादीगु खः ।

उदाय म्येँ हायेकाः न्ह्याःगु ज्याझ्वलय् न्वकु संसारधर तुलाधरं लसकुस यानादीगु खःसा मूछ्यांजे सुरुप तुलाधरं वार्षिक प्रगति व दांभरिं सागरसिद्धि तुलाधरं आर्थिक विवरण न्ह्यब्वयादीगु खः । थीथी उपसमितिं थःथःगु प्रगति विवरण न्ह्यब्वयेगु झ्वलय् मिसा पुचःया मिनु तुलाधर, गुंला बाजंया सुशीलरत्न तुलाधर, संरक्षण मण्डलया सागरमान तुलाधर, अनुसन्धान पुचःया पद्मधर तुलाधर नं नुगःखँ प्वंकादीगु खः ।

अथे हे अनिलरत्न तुलाधर, राजप्रकाश तुलधर, सर्वज्ञरत्न तुलाधर, पूर्णरत्न तुलाधरं नं सल्लाह व सुझाव बियादीगु खः । तःमुँज्याया मेगु ब्वय् समितिया न्हूगु ज्यासना पुचःया ल्यज्या नं याःगु खः । न्हूगु ज्यासना पुचलय् संसारधर तुलाधरयात न्हूम्ह नायः ल्यःगु दु । अथे हे न्वकु भाइराजा तुलाधर, मूछ्यांजे पूर्णरत्न तुलाधर, छ्यांजे ज्ञानेन्द्ररत्न तुलाधर, दांभरिं विद्याराज तुलाधर व लिउ दांभरिंलय् अमूल्यमान तुलाधर च्वनादीगु दु ।

सम्बन्धित बुखँ

LEAVE YOUR COMMENTS